Mańǵystaý aýdanynda turatyn, biri 104 jáne 100 jastaǵy tyl ardagerleri saıası naýqannan tys qalmaı, óz tańdaýlaryn jasady.
Qanzııa Saqaýova 104 jasta. Jastaıynan kolhoz, sovhozdyń jumysyna aralasyp, elge qyzmet etip kelgen qarııa, elge paıdasy tıgenin qalaıdy. Al birer kún buryn 100 jasqa shyqqan Aqilgek Qulbaraqova «meniń tańdaýym – beıbitshilik», deıdi.
Qos ǵasyrdyń kýási bolǵan keıýanalardan daýys úılerine baryp alyndy.
* * *
Parlament Májilisi pen máslıhat depýtattarynyń saılaýyna Jetisý jurty da belsendi daýys berýde. Jalpy, Almaty oblysy boıynsha 1 400 038 turǵyn daýys berýge quqyly bolsa, olardyń 30 paıyzdan astamy túske deıin daýys bergen. Saılaý kúni 109 jastaǵy Altynhan áje de óz tańdaýyn jasady.
Jetisýdaǵy qart saılaýshy Sarqan aýdanynda turady eken. Qarııanyń úıden daýys berýine jaǵdaı jasap, kóshpeli jáshik ákelgen saılaý komıssııasynyń ókilderine batasyn bergen óńirdiń qart turǵyny Altynhan Beldeýbaı:
– Osyndaı beıbit kúndi halqymyz kóp ańsady. Endi osy táýelsizdikti baǵalaýymyz kerek. Meniń jasym júzden asyp ketse de, eshqashan saılaýdan tys qalǵan emespin, saılaýǵa ár azamattyń barýy mindetti. Saılaýda elimizdiń bolashaǵy sheshiletin kún, oǵan beıjaı qaramaǵan jón. Elimiz aman jurtymyz tynysh, ár otbasyna bereke-birlik tileımin, – dedi.
* * *
Qyzylorda oblysy Syrdarııa aýdanynda turatyn 99 jastaǵy soǵys ardageri Iаhııa Tasyrov saılaý ýchaskesine ózi baryp, tańdaýyn jasady. Mańyzdy naýqanda qart jaýynger aýdan ortalyǵyndaǵy №155 saılaý ýchaskesinde alǵashqy bolyp daýys berdi. Ardager buǵan deıingi saılaý naýqandarynda da óz belsendiligimen kózge túsip júrgen bolatyn.
«Saılaý – memlekettiń árbir azamatynyń óz bolashaǵy úshin tańdaý bildirý quqyǵy. Men barlyq saılaýda osyndaı belsendilik tanytyp kelemin. Alǵashqylardyń biri retinde tańdaý jasaımyn. Búgin de sol ádetimnen jańylǵan joqpyn», dedi Iаhııa Tasyrov.
Maıdanger qarııa saıası naýqannyń sátti ótýine aq batasyn berdi. «Syrdarııa aýdanynyń Qurmetti azamaty» Iаhııa Tasyrov 1922 jyly Syrdarııa aýdany A.Toqmaǵanbetov aýylynda dúnıege kelgen. Stalıngrad, Belarýs, Kýrsk qalalaryn, Polshany azat etýge qatysqan. Maıdanger 120 jaýyngerden quralǵan avtomatshylar rotasynda bolǵan.
Surapyl soǵys kezinde oń aıaǵyna oq tıgen. Elge kelgennen keıin orta mektepte áskerı daıarlyq páninen sabaq berdi. Odan keıingi jyldarda eńbegi Tereńózek, Jalaǵash aýdandyq maı zaýyttarynda jalǵasty. Beride otyn daıyndaý mekemesinde jumys istep, 1981 jyly zeınetkerlikke shyqqan.
Daıyndaǵandar
Qalmahanbet MUQAMETQALI,
Dınar KERIM,
«Egemen Qazaqstan»