Elordada «Qazaqstan Respýblıkasy Prezıdenti Is Basqarmasy Medısınalyq ortalyǵynyń aýrýhanasy» RMK-nyń 229 jabyq saılaý ýchaskesinde Kúlásh Áskeeva daýys berdi. Bıyl ol 100 jasqa tolady, dep habarlaıdy Egemen.kz. elorda ákimdigine silteme jasap.
Kúlásh Áskeqyzy ár jyldary Talas aýdanynyń Krýpskaıa atyndaǵy jeti jyldyq mektebinde muǵalim, dırektor bolyp jumys istegen. Komsomol komıtetiniń birinshi hatshysy, Jambyl oblystyq komsomol komıtetiniń nusqaýshysy, Kegen aýdany komsomol komıtetiniń birinshi hatshysy, Jambyl aýdany partııa komıtetiniń nusqaýshysy, Krasnogor aýdany partııa komıtetiniń bólim meńgerýshisi, BKP(b) Krasnogor aýdandyq komıtetiniń úshinshi hatshysy, birinshi hatshysy, Qazaq KSR áleýmettik qamsyzdandyrý mınıstriniń orynbasary qyzmetterin atqarǵan.
Sondaı-aq Kúlásh Áskeqyzy KSRO Joǵarǵy keńesiniń 3-shi shaqyrylymynyń depýtaty bolyp saılanǵan.
«Ol kisi jyly shyraımen qarsy alyp, alǵysyn bildirdi. Elimizdiń órkendeýin tiledi. Kúlásh Áskeqyzy saıası bilimdi, saılaý týraly aqparattyń bárinen habardar. Barlyq 5 partııany, olardyń baǵyttaryn biledi. Elimizde bolatyn saılaýlarǵa turaqty qatysatynyn aıtty. Ol Májilis pen máslıhat bıýlletenderin óz betimen oqyp shyqty», — dedi saılaý komıssııasynyń tóraıymy Gúljan Ysqaqova.
Onyń aıtýynsha saılaýshylar saılaýǵa úlken qyzyǵýshylyq tanytyp otyr.
«Bári azamattyq ustanymyn kórsetti. Kelgen saılaýshylar kóńildi kelip qatysyp jatty. Saılaý ýchaskesinde mýzyka oınap, saılaýshylarmen birge ánuran shyrqaldy», — dedi saılaý komıssııasynyń tóraǵasy.