Fýtzaldan Qazaqstannyń ulttyq quramasy men Almatynyń «Qaırat» klýbynyń qaqpashysy Igıta 2020 jyldyń qorytyndysy boıynsha álemniń úzdik golkıperi atanýy múmkin.
Brazılııanyń Rıo-de-Janeıro qalasynda týyp-ósken aıtýly fýtzalshy 2011 jyldan beri «Qaıratta» óner kórsetýde. 2013 jyly Qazaqstannyń azamattyǵyn alyp, ulttyq komandamyzdyń jeıdesin kıdi. Sol kezden beri ózine ǵana tán keremet oıyn máneri jáne teńdessiz ónerimen kózge túsip, san mıllıon jankúıerdiń júregin jaýlady. Búgingi tańda Almatynyń «Qaırat» klýbynyń bıik belesterdi baǵyndyryp, tórtkúl dúnıege tanylýyna Igıtanyń eńbegi orasan zor ekeni esh daý týǵyzbasa kerek. 2015, 2016, 2018 jáne 2019 jyldary ol álemniń eń úzdik qaqpashysyna tıesili arnaıy syılyqty ıelendi. Mine, endi besinshi ret teńdessiz dep tanylýyna tamasha múmkindik týyndap otyr.
Igıtadan bólek, joǵaryda atalǵan ataqtan úmitkerler qatarynda Kareka (Brazılııa), Dıdak Oltra (Ispanııa), Edý (Portýgalııa), Gýıtta, (Brazılııa), Hesýs Errero (Ispanııa), Dıego Ronkalo (Brazılııa), Álıreza Samımı (Iran), Albert Saıder (Reseı) jáne Vıllıan (Brazılııa) syndy qaqpashylar bar.