Katardyń bas shahary – Dohada ótip jatqan Masters týrnırinde 73 kılo salmaq dárejesinde kúresken Jansaı Smaǵulov jeńis tuǵyryna synyq súıem qalǵanda súrindi, dep habarlaıdy Egemen.kz.
Aıtýly jarysty Jansaı óte keremet bastady. Alǵashqy úsh qarsylasyn ol merzimine jetkizbeı taza, ıaǵnı ıppon ádisimen utty. Atap aıtsaq, fransııalyq Gııoma Shane, kanadalyq Artýr Marjelıdon jáne kosovalyq Akıl Gıakova qazaq balýanynyń qarqynyna shydaı almady. Jartylaı fınalda bizdiń jigittiń álem chempıony jáne sol jarystyń úsh dúrkin qola júldegeri, Azııa oıyndarynyń qola júldegeri, Dúnıejúzilik Ýnıversıadanyń jeńimpazy jáne qurlyq chempıony degen dardaı ataǵy bar Ońtústik Koreıanyń ókili An Chang Rımge áli jetpedi. Al qola medal úshin básekede germanııalyq Igor Vandtke jolyn bergen Jansaı Smaǵulov besinshi oryndy qanaǵat tutty.
Sol kúni 81 kılo salmaqta kúsh synasqan Azııa oıyndarynyń jeńimpazy Dıdar Hamzaǵa da úlken úmit artqan edik. Alaıda óziniń tusaýkeser kezdesýinde ol ózbekstandyq Sharofıddın Boltaboevqa ese jiberdi.