Álem ǵalymdary dabyl qaǵyp otyr. Oǵan sebep koronavırýstan jazylyp ketkennen keıin de kóptegen naýqastardyń aýyr asqynýlardan zardap shegýi. Bul qubylys «postkovıdtik sındrom» dep ataldy, dep habarlaıdy Egemen.kz. Bul týraly BBC News basylymy aqparat taratty.
Mamandardyń aıtýynsha, psıhıkalyq buzylýlar, apatııa jáne sýısıdtik oılar - osyndaı asqynýlardyń nátıjesi. Koronavırýspen aýyrǵan adamdar aılar boıy ózderiniń burynǵy ómirine oralýǵa tyrysady. Degenmen kóp jaǵdaıda bul umtylys sátti bola bermeıdi.
Koronavırýs psıhologııalyq aqaýlar týdyratyny týraly kóptegen sheteldik ǵalymdar da aıtyp keledi. Qarasha aıynda Brıtandyq Oksford ýnıversıteti ǵalymdarynyń Lancet jýrnalynda jarııalanǵan maqalasy da buǵan dálel bola alady .Onda ǵalymdar 69 mıllıon AQSh turǵynynyń medısınalyq kartasyn taldady. Olardyń 62 myńnan astamy koronavırýspen aýyrǵan.
Zertteý kórsetkendeı, amerıkandyqtardyń besten birine koronavırýstan keıin de úsh aı ishinde psıhıkalyq buzylys dıagnozy qoıylǵan. Kóbinese bul mazasyzdyq, depressııa jáne uıqysyzdyq belgileri arqyly baıqalady.
Rabıǵa Nurǵalı