Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine jyljymaıtyn múlikke quqyqtardy jáne zańdy tulǵalardy memlekettik tirkeý máseleleri boıynsha ó zgerister men tolyqtyrýlar engizý týraly» zań jobasy talqylandy.
Zań jobasy jyljymaıtyn múlikke quqyqtardy tirkeý merzimin buzǵany úshin ákimshilik jaýapkershilikti alyp tastaýǵa, qujattardy resimdeý jáne jyljymaıtyn múlikke quqyqtardy memlekettik tirkeý rásimderin ońaılatýǵa múmkindik beredi. «Aqparat quqyqtyq kadastrdan elektrondy úkimet veb-portaly arqyly beriletin bolady. Bul quqyqtardy elektrondy tirkeý kezinde vedomstvoaralyq úılestirýdi arttyrýǵa, sondaı-aq málimetterdi quqyqtyq kadastrdan ýákiletti organdar men tulǵalarǵa berýge múmkindik beredi», dedi komıtet hatshysy Qanatbek Safınov.
Sondaı-aq zańnamalyq deńgeıde engizilgen túzetýlermen jergilikti atqarýshy organdarǵa jyljymaıtyn múlik obektisin buzý týraly qujatty berý jónindegi fýnksııalardy bekitý jáne sharýashylyq seriktestikterine qatysýshylar quramynyń ózgerýine baılanysty ony qaıta tirkeý tártibin aıqyndaý josparlanyp otyr. «Zań jobasy sot oryndaýshylarynyń quqyq belgileıtin qujattardyń kóshirmelerin alý quqyǵyn bekitý nátıjesinde sot aktileriniń ýaqtyly oryndalýyn qamtamasyz etýge yqpal etedi», dedi senator Nurlan Beknazarov.
«Qazaqstan Respýblıkasynyń keıbir zańnamalyq aktilerine jyljymaıtyn múlikke quqyqtardy jáne zańdy tulǵalardy memlekettik tirkeý máseleleri boıynsha ózgerister men tolyqtyrýlar engizý týraly» zań jobasyna Parlament Senaty men Májilisi depýtattary bastamashy bolǵan edi, dep habarlady Senattyń baspasóz qyzmeti.