О́zbekstanda býkmekerlik qyzmet zańdastyryldy. Bul týraly «Habar 24» habarlady.
Qazir el bıligi salany retteıtin tıisti normatıvtik bazany quryp jatyr. Býkmekerler el qazynasy jyl saıyn 150 mln AQSh dollary kóleminde qosymsha kiris ákeledi dep senedi ala taqııaly aǵaıyn.
«Býkmekerlik qyzmettiń ekonomıkalyq tıimdiligi joǵary» degen ýájben ózbek bıligi jyl basynan sporttyq sharalarǵa aqsha tigýdi zańdastyrdy. Prezıdenttiń osyǵan qatysty tıisti jarlyǵy shyqty. Oǵan sáıkes oıyn-saýyq oryndary tapqan paıdanyń belgili mólsherin sporttyń damýyna jumsaýy tıis.
«Býkmekerlik keńseler tapqan paıdanyń bir bóligin bir toqsanda bir ret, álde ár aıda, ne jarty jyl saıyn sporttyń damýyna bólýi tıis. Iа bolmasa bul aqshany salyqpen qosa el qazynasy salady. Buǵan qatysty naqty tetikter ázirge oılap tabylǵan joq. Degenmen paıda tabýdyń mundaı amaly Qazaqstanda da, Reseıde de bar. Máselen, Reseıdiń zańynda tabystyń belgili bir mólsherin sporttyń damýyna jumsaý mindetti degen tarmaq bar», deıdi О́zbekstan fýtbol qaýymdastyǵynyń zańgeri Dılshod Narkobılov.
Kórshi eldiń oıynqumar azamattary qazir kóleńkeli mekemelerde oınap júr. Tipti sporttyq sharalarǵa bás tigý úshin shetel asatyndar da barshylyq. Osylaısha ózbekstandyq oıynshylardyń jylyna 150 mln AQSh dollary ózge býkmekerlerdiń qaltasyna ketip otyr dep nalıdy bıliktegiler.