Atyraýda qazaq jýrnalıstıkasynyń negizin salýshy, professor Taýman Amandosov atyndaǵy oblys ákimi syılyǵynyń ıegerleri marapattaldy. On atalymnyń jeńimpazdaryna 500 myń teńgeden qarjylaı syıaqy berildi.
Syılyqty jeńimpazdarǵa oblys ákimi Mahambet Dosmuhambetov tapsyrdy.
«Qaı kezde de aqparat salasynyń mamandary – qoǵamnyń aınasy. Pandemııa ýshyǵyp turǵan kezde dárigerlermen birge, jýrnalıster de aldyńǵy shepte júrdi. Qaýipti aımaqtan tikeleı reportajdar júrgizip, shynaıy aqparatty taratty. Bul – BAQ ókilderiniń kásibine adaldyǵynyń kórinisi» dedi Mahambet Dosmuhambetov.
Qazylar alqasynyń sheshimimen «Úzdik jýrnalıst–2020» nomınasııasyn belgili jýrnalıst, «Saraıshyq» jýrnalynyń bas redaktory Isataı Balmaǵambetov ıelendi. «Atameken» UKP Atyraý oblysy boıynsha fılıalynyń baspasóz hatshysy Ásel Tuıaqpaeva – «Úzdik baspasóz qyzmeti–2020», volonter ári bloger Qýat Janeseev – «Úzdik bloger–2020», óńirlik kommýnıkasııalar qyzmetiniń dızaıneri Elaman Nýhın «Úzdik vızýaldy jumys–2020» nomınasııasymen marapattaldy.
Al, «Úzdik kreatıvti shyǵarmashylyq–2020» nomınasııasyna jýrnalıst Nurbergen Maqym, «KTK» arnasynyń Atyraý oblysyndaǵy menshikti tilshisi Beken Álırahym «Úzdik menshikti tilshi–2020», «Atyraý–Aqparat» JShS baspahanasynyń túpteý sehynyń túpteýshisi Altynaı Tantýarova «Úzdik tehnıkalyq maman–2020» atalymyna ıe boldy.
Sondaı-aq «Úzdik kadr–2020» nomınasııasy «Atyraý» telearnasynyń operatory Qanat Eleýovke, «Úzdik ınternet pablık–2020» atalymy «Faceebok»-tegi paraqshasy úshin bloger Arman Haırýlınge, «Úzdik redaksııa–2020» syılyǵy Qurmanǵazy aýdandyq «Serper» gazetine tapsyryldy.
Bir top jýrnalıske 1 mıllıon teńgelik «Turǵyn úı» sertıfıkaty tabystaldy.