Májilis komıtetteriniń quramy bekitildi

Zańǵa sáıkes, VII sessııanyń alǵashqy jalpy otyrysynda depýtattar halyq aldynda ant qabyldaıdy. Osyǵan baılanys­ty jıyn barysynda jańadan saılanǵan depýtattar birinen keıin biri minberge shyǵyp, «Qazaqstan halqyna adal qyzmet etýge, Qazaqstan Respýblıkasynyń tutas­tyǵy men táýelsizdigin nyǵaıtýǵa, onyń Konstıtýsııasy men zańdaryna qatań baǵynýǵa, depýtattyń ózime júktelgen mártebeli mindetterin adal atqarýǵa ant etemin», dedi.

Bir saǵattan asa ýaqytqa sozylǵan bul rásimniń qyzyǵy men shyjyǵy kóp boldy. Minberge shyqqan keı depýtattar anttyń mátinin umytyp, qaǵazǵa qaraǵandary da kez­desti. Endi biri eki jastaǵy bala sekil­di, memlekettik tilde byldyrlap, bir­deńeni aıtyp shyqty. Osyndaıda, tórt aýyz sózdi jattap aıta almaǵan, ana tili­mizde saqaýlanyp sóılegen depýtat­tarǵa qarap otyryp, aldaǵy bes jylda Májilistegi memlekettik tildiń jaıy taǵy da máz bolmaıtynyn kórýge bolatyn sekildi.

Zańnamaǵa sáıkes, jalpy otyrys barysynda depýtattar eń aldymen Máji­listiń jańa tóraǵasyn jasyryn daýys berý arqyly saılady. Depýtattar Palata Tóraǵasy qyzmetine Nurlan Nyǵ­ma­týlınniń kandıdatýrasyn usyndy.

Depýtat Darhan Myńbaı Nurlan Nyǵmatýlınniń zor kásibı tájirıbesin, Tuńǵysh Prezıdent – Elbasy Nursultan Nazarbaevtyń, Memleket basshysy Qasym-Jomart Toqaevtyń tapsyrmalaryn oryndaý jónindegi nátıjeli jumy­syn, sondaı-aq Májilistiń ótken shaqy­rylym­darynda barlyq parlamenttik frak­sııa­larmen syndarly dıalog ornat­qanyn atap ótti.

Aıta keterligi, Nurlan Nyǵmatýlınniń kandıdatýrasyn Elbasy, Nur Otan partııa­synyń Tóraǵasy Nursultan Nazar­baev Májilistegi partııa fraksııasy­na usynǵan bolatyn. Nur Otan fraksııa­sy­nyń depýtattary Elbasynyń bul usynysyn biraýyzdan qoldady.

Májilis depýtaty Saýytbek Abdrah­manov usynylǵan kandıdat týraly óz pikirin ortaǵa saldy.

«Nurlan Zaırollauly Nyǵmatýlınniń bul qyzmetke usynylǵan kandıdatýrasyn ol kisi tipti osyǵan deıin Májilisti bas­qaryp kórmese de qoldar edim. О́ıtkeni, Nurlan Nyǵmatýlın qala­da da, mınıstrlikte de, oblysta da, ákim­shilikte de basshy qyzmette bolyp, olardyń qaı-qaısysynda da ómir­diń úlken synaǵynan ótti. Elbasy Nursultan Ábishuly Nazarbaevtyń synyna shydas berip, qazaqsha aıtqanda ot pen sýdan ótken tulǵa», dedi depýtat S.Abdrahmanov.

Jıyn barysynda «Aq jol» demo­kratııalyq partııasy­nyń aty­nan sóz sóılegen Azat Perýashev usy­nyl­ǵan kandıdatýrany qoldaıtynyn jetkizdi.

«Nurlan Nyǵmatýlın kelgeli biz kez kelgen másele boıynsha óz pikirimizdi ashyq aıtýǵa múmkindik aldyq. Sodan beri mıkro­fondy óshirý tájirıbesi burynǵy ýaqyt­tyń enshisinde qaldy. Onyń ústine, Nurlan Zaırollauly 2016 jyly qaıta tóraǵa bolǵannan keıin Palata regla­mentine «partııa fraksııasynyń, depýtat­tyq toptyń atynan sóz sóıleý úshin min­det­ti túrde sóz beriledi» degen túzetý engizý bas­tamasyn kóterdi», dedi Azat Perýashev.

Qazaqstan Halyq partııasy atynan Aıqyn Qońyrov ta kandıdatqa qatysty óz pikirimen bólisti.

«Men qarapaıym depýtat retinde, sodan keıin fraksııa jetekshisi retinde Nurlan Zaırollaulymen Parlament Má­ji­lisiniń V jáne VI shaqyrylym­daryn­da jumys istedim», dedi. A.Qońyrov.

Sonymen qatar depýtat óz sózinde Nurlan Nyǵmatýlınniń elimizde par­la­mentarızmdi damytý jolynda bar kúsh-jigerin salǵan naǵyz halyq tań­daýy ekenin, sondaı-aq joǵary zań shyǵa­rý­shylyq organdaǵy óte bilikti basqa­rýshy ekenin aıtty. Nurlan Nyǵmatýlınniń kandıdatýrasyn Májilis depýtattary Snejanna Imasheva men Baqytbek Smaǵul da qoldap, sóz sóıledi.

Jalpy otyrysta Májilis Tóraǵasy qyzmetine basqa kandıdattar usynylǵan joq. Osy oraıda N.Nyǵmatýlınniń kan­dıdatýrasy jasyryn daýys berý bıýlletenine engizildi.

Konstıtýtsııaǵa sáıkes, Májilis Tóraǵasy memlekettik tildi erkin meń­gerýi tıis. Spıkerdi Májilis depýtattary jasyryn daýys berý arqyly saılaıdy. Kópshilik daýys jınaǵan kandıdat Tóraǵa bolyp saılanady.

Osyǵan baılanysty, daýysty sanaý úshin jeti depýtattan turatyn sanaq ko­mıs­sııasy qurylyp, onyń tóraǵasy – Májilis depýtaty Muhtar Erman, hatshysy depýtat Aıgúl Nurkına bolyp belgilendi.

Májilis depýtattary jasyryn daýys berý arqyly Nurlan Nyǵmatýlınniń kandıdatýrasyn biraýyzdan qoldady. Qazaqstan Respýblıkasy Parlamenti Májilisiniń Tóraǵasyn saılaý týraly Májilistiń Qaýlysy qabyldanǵannan keıin Nurlan Nyǵmatýlın sóz sóıledi.

«Eń aldymen, meni taǵy da osy joǵary laýazymdy qyzmetke, Májilis Tóraǵasy retinde saılaǵandaryńyz úshin shyn júrek­ten alǵysymdy bildirýge ruqsat etińiz­der. Eń birinshiden, bul men úshin óte úl­ken jaýapkershilik. Sondyqtan, árqashan­da El­ba­sy­myz Nursultan Ábishuly Nazar­baev­tyń jáne Prezıdentimiz Qasym-Jomart Kemeluly Toqaevtyń ózime júkte­gen mindetterin joǵary deńgeıde oryn­daý úshin, sizderdiń jáne bizdiń saılaýshy­lardyń senimderin aqtaý úshin men barlyq jınaǵan bilimimdi, jınaǵan tájirıbemdi jumsaımyn», dedi Nurlan Nyǵmatýlın.

Budan keıin Palata jetekshisi «Qazaq­stan Respýblıkasynyń Parlamenti jáne onyń depýtattarynyń mártebesi týraly» Konstıtýsııalyq zańǵa sáıkes, Palatanyń vıse-spıkerleri qyzmetine Balaım Kesebaeva men Pavel Kazansevtiń kandıdatýralaryn talqylaýǵa usyndy.

Májilis depýtattary kandıdattardy bir­aýyz­dan qoldady. Balaım Kesebaeva – zań­ger, Ádilet mınıstrliginde qyz­met at­qarǵan. Mańǵystaý jáne Qyzyl­orda ob­lys­­taryndaǵy Ádilet departament­terin bas­qarǵan. Sonymen qatar Májilis­tiń VI sh­aqy­rylymynda Zańnama jáne sot-quqyq­tyq reforma komıtetiniń múshesi boldy.

Pavel Kazansev – Májilistiń Ekono­mıkalyq reforma jáne óńirlik damý komıtetiniń quramynda qyzmet etti. Nur Otan partııasy janyndaǵy Partııalyq baqylaý komıtetin basqarady. Sondaı-aq P.Kazansevtiń ákimshilik jáne partııalyq jumysta úlken tájirıbesi bar.

Jalpy otyrys barysynda depýtattar Palata komıtetteriniń tóraǵalaryn saılady. VII shaqyrylǵan Májilistiń jańashyldyǵy – zańnamaǵa sáıkes, parlamenttik oppozısııanyń depýtattaryna Palatanyń turaqty komıtetiniń tóraǵasy, sondaı-aq eki komıtettiń hatshylary laýazymyna saılaný quqyǵy kepildendirilgen.

Osyǵan sáıkes, Májilis Tóraǵasy Nurlan Nyǵmatýlın Palata depýtattaryna fraksııa basshylarynyń parlamenttik oppozısııa ókilderi Palatanyń eki komı­tetin basqaratyndyǵy týraly birlesken sheshimi týraly habarlady. Atap aıtsaq, Agrar­lyq máseleler komıteti men Ekolo­gııa má­seleleri jáne tabıǵat paıdalaný ko­mı­tetterin oppozısııa ókilderi basqar­maq. Oǵan «Aq jol» partııasynan Er­lan Bar­lybaev jáne Qazaqstan Halyq par­­tııa­­synyń partııalyq tizimi boıynsha saı­lanǵan Aleksandr Mılıýtın usynyldy.

Turaqty komıtetterdiń tóraǵalary ashyq daýys berý arqyly Agrarlyq máse­le­ler komıtetine – Erlan Barlybaev («Aq jol»), Áleýmettik-mádenı damý komı­tetine – Jámılá Nurmanbetova (Nur Otan), Zań­nama jáne sot-quqyqtyq reforma ko­mıtetine – Qanat Mýsın (Nur Otan) taǵa­ıyndaldy. Qarjy jáne bıýdjet komıtetin Marat Qusaıynov (Nur Otan), Halyqaralyq ister, qorǵanys jáne qaýipsizdik komıtetin Aıgúl Quspan (Nur Otan) basqarmaq.

Al Ekologııa máseleleri jáne tabıǵat paıdalaný komıtetine – Aleksandr Mılıýtın (QHP), Ekonomıkalyq reforma jáne óńirlik damý komıtetine Albert Raý (Nur Otan) saılandy. Komıtet tóraǵa­larynyń baıandamalarynan keıin Palata Májilis komıtetteriniń quramyn bekitti.

Budan keıin Májilis úzilis jasap, qaı­ta jınalǵanda jańa Premer-Mı­nıstr­di taǵaıyndaýǵa kelisim berý týraly má­se­leni qarady. Qazaqstan Res­pýb­lıka­sy­­nyń Konstıtýsııasyna sáıkes, Úkimet jańadan saılanǵan Par­lament Má­ji­li­siniń aldynda óz ókilet­tigin doǵarady. Osy­ǵan baılanysty, Prezıdentke eldiń Premer-Mınıstrin taǵaıyndaýǵa kelisim berý tý­ra­ly másele Májilistiń alǵashqy jal­py oty­rysynyń kún tártibine engizildi.

Memleket basshysy Qasym-Jomart Toqaev Parlament Májilisiniń otyrysynda elimizdiń áleýmettik-ekonomı­ka­lyq damýyn qorytyndylap, atqarýshy bılik tarmaǵynyń pandemııa saldarynan bolǵan jahandyq daǵdarys jaǵda­ıyn­daǵy is-áreketine baǵa berdi.

«Úkimet daǵdarysqa qarsy jospardy tıimdi júzege asyrdy. Sonyń arqasynda jumyssyzdyqtyń kóbeıýine, halyq tabysynyń jappaı tómendeýine jol berilgen joq. Bul sharalar tıimdi boldy», dedi Qasym-Jomart Toqaev.

Sonymen qatar Memleket basshysy elimizdegi negizgi makroekonomıkalyq kórsetkishterdiń turaqty jáne qarjy júıesiniń ornyqty ekenin atap ótti. Qazaq­stan Prezıdenti Úkimet pen Máji­listiń jańa quramy ekonomıkanyń uzaq merzimdi ósimin qamtamasyz etýge jáne halyqtyń ál-aýqatyn jaqsartýǵa basa kóńil bólýi tıis ekenin aıtty.

Qasym-Jomart Toqaev Jańa Úki­met­tiń tıimdi jáne úzdiksiz jumys isteýin qamtamasyz etý maqsatynda el Konstıtýsııasynyń 44-babyna sáıkes, Qazaqstan Respýblıkasynyń Premer-Mınıstri laýazymyna taǵaıyndaýǵa kelisim berýi úshin Asqar Mamınniń kandıdatýrasyn Parlament Májilisiniń qaraýyna usyndy. Memleket basshysy óziniń sheshimin túsindire kele, Asqar Mamınniń bilikti ári tájirıbeli, eńbekqor, talapshyl jáne parasatty memlekettik qyzmetshi ekenin atap ótti.

«Ol aldymyzda turǵan maqsat-mindetterdi jaqsy túsinedi. Onyń Úkimettegi nátıjeli jumysy – sonyń aıqyn dáleli», dedi Prezıdent.

Májilis depýtattary Memleket bas­shy­syna Asqar Mamındi Premer-Mı­nıstr etip taǵaıyndaýǵa kelisim berdi. Jıyn sońynda Qasym-Jomart Toqaev Má­ji­lis depýtattaryna ózi usyn­ǵan kan­dı­da­týrany qoldaǵany úshin rızashy­lyǵyn bil­dirip, Asqar Mamındi jaýapty la­ýa­zymǵa taǵaıyndalýymen quttyqtady.

Depýtattar aldynda sóz sóılegen Asqar Mamın kórsetilgen senim úshin alǵysyn bildirip, odan ári de tıimdi de nátıjeli jumys isteıtinin aıtty.

«Eń aldymen maǵan kórsetken senimderińizge alǵys aıtamyn. Bul men úshin zor mártebe jáne úlken jaýap­kershilik. Aldymyzda Qazaqstannyń turaqty áleýmettik-ekonomıkalyq damýy boıynsha úlken maqsat-mindetter qoıylǵan. Búgin Memleket basshysy Qasym-Jomart Toqaev elimizdiń damýynyń basym baǵyttaryn jarııalady. Sonyń ishinde eń bastysy – halyqtyń tabysyn arttyrý», dedi Asqar Mamın.

Úkimet basshysy bul mindetterdi ekonomıkany qarqyndy damytý arqyly oryndaýǵa bolatyndyǵyn aıtty.

«Osy maqsatta ekonomıkanyń básekege qabilettiligin arttyrý, ınvestısııa­lar tartý, jańa tehnologııalardy engizý, jańa jumys oryndaryn qurý jáne taǵy da basqa baǵyttar boıynsha tıimdi sharalar iske asyrylady. Osy strate­gııalyq min­detterdi iske asyrýda Úkimet Parla­ment­pen birge úılesimdi ári nátıjeli jumys isteıtin bolady», dedi Asqar Mamın.