Senbi kúni fýtzaldan ÝEFA Chempıondar lıgasynyń 1/16 fınalyndaǵy birqatar match ótti. Aıtýly dodada baq synap jatqan Qazaqstannyń eki birdeı komandasy óz oıyndaryn qonaqta ótkizip, qarsylastarynan basym tústi.
Máselen, Belarýstiń Mogılev qalasynda jergilikti «VıtEn» klýbymen oınaǵan Almatynyń «Qaıraty» 5:2 esebimen jeńiske jetip, jarystyń kelesi kezeńine joldama aldy. Matchtyń birinshi kezeńinde jerlesterimiz qarsylas komanda qaqpasyna jaýapsyz úsh gol soqty. Oıynnyń nebary 11-sekýndynda Savıo esepti ashsa, Ýmberto (16-mınýt) men Dıego (18-mınýt) óz esimderin tabloǵa jazdyrtty. Al ekinshi taımda Birjan Orazov (34-mınýt) pen Dýglas Kosta (36-mınýt) bir-bir gol soǵyp, «Qaıratqa» jeńis syılady.
Sonymen qatar «Aqtóbe» komandasy da syrt alańda Grekııanyń AEK klýbynan 5:2 esebimen basym tústi. Bul kezdesýde «Aqtóbe» ujymynan Bekjan Dáýletov (16-mınýt), Olıveıra (21), Dmıtrıı Klochko (27), Ashat Kólbaev (32) jáne Nurbek Qaraǵulov (36) mergendigimen kózge tústi. Endi jerlesterimizdiń kelesi qarsylasy 20 qańtarda ótetin jerebe tartý rásiminde belgili bolady. Al 1/8 fınaldyń oıyndary 16-21 aqpan aralyǵyna josparlanǵan. Kelesi kezeńniń básekeleri de bir oıynnan turady.