QR Ulttyq ekonomıka mınıstri taǵaıyndaldy. Bul týraly Aqorda jarııalaǵan Qazaqstan Respýblıkasy Úkimetiniń quramy týraly Jarlyqta «Áset Armanuly Erǵalıev – Qazaqstan Respýblıkasynyń Ulttyq ekonomıka mınıstri» delingen, dep jazady Egemen.kz.
Buǵan deıin Erǵalıev QR ulttyq ekonomıka birinshi vıse-mınıstri bolyp qyzmet etken. Ulttyq ekonomıka mınıstri qyzmetinde oǵan deıin Rýslan Dálenov bolǵan. Ol bul qyzmetke 2019 jyldyń aqpanynda taǵaıyndalǵan edi.
Áset Erǵalıev Qazaqstandyq menedjment, ekonomıka jáne boljamdaý ınstıtýtynyń (KIMEP) memlekettik saıasat ekonomıka salasynda bakalavr dárejesinde úzdik támámdady (Almaty, Qazaqstan). Halyqaralyq Ionkopıng bıznes mektebin halyqaralyq ekonomıka salasynda ǵylym bakalavry dárejesimen (Jönköping University, Shvesııa), Iork ýnıversıtetin ekonomıkadaǵy ǵylym magıstri dárejesimen (University of York, Ulybrıtanııa), Nottıngem ýnıversıtetin ekonomıkadaǵy fılosofııa magıstri dárejesimen (The University of Nottingham, Ulybrıtanııa) aıaqtady.
Áset Erǵalıev London ekonomıka jáne saıası ǵylymdar mektebiniń PhD doktory dárejesin ıemdengen (London, Ulybrıtanııa). Eńbek jolyn Londondaǵy Eýropalyq damý jáne qaıta qurý bankiniń (EDQB) Shyǵys Eýropa, Kavkaz jáne Ortalyq Azııa boıynsha ekonomıka departamentiniń aýmaqtyq ekonomısti retinde bastaǵan.
2013 jylǵy qańtardan bastap 2016 jylǵy maýsym aralyǵynda «Ekonomıkalyq zertteýler ınstıtýty» AQ Kásipkerlikti damytý ortalyǵynyń dırektory, basqarma tóraǵasynyń orynbasary, basqarma tóraǵasy laýazymdaryn atqarǵan. 2016 jylǵy jeltoqsannan bastap 2017 jylǵy shilde aıyna deıin Qazaqstan Respýblıkasy premer-mınıstriniń keńesshisi bolyp qyzmet istegen.
2017 jylǵy tamyzdan bastap Qazaqstan Respýblıkasy premer-mınıstri keńsesiniń Jobalaýdy basqarý ortalyǵynda jumys istedi. Vıse-mınıstr qyzmetine taǵaıyndalǵanǵa deıin Qazaqstan Respýblıkasy premer-mınıstri keńsesiniń Jobalaýdy basqarý ortalyǵynyń meńgerýshisi qyzmetin atqardy.
2019 jyldyń tamyzynda ol QR ulttyq ekonomıka birinshi vıse-mınıstri bolyp taǵaıyndalǵan edi.
Aıta keteıik, buǵan deıin Úkimettiń jańa quramy jarııalanǵanyn habarlaǵan bolatynbyz.