Sahnalyq ónerdiń syryna úńilsem deıtin almatylyq oqýshylar úshin jańa múmkindik ashyldy. Jambyl atyndaǵy Qazaq memlekettik fılarmonııasy daryndy órender úshin «Hor vokaly» úıirmesin uıymdastyryp otyr. Eń qyzyǵy – jas talapkerler halyqaralyq deńgeıde óner kórsetip júrgen sahna sańlaqtarynan sabaq alady.
Úıirmege daýys ereksheligine qaraı iriktelgen 7 men 14 jas aralyǵyndaǵy mektep oqýshylarynyń qatysýyna bolady. Mýzykaǵa talaby bar jastardy hor ónerine baýlý maqsatynda josparlanǵan biregeı jobada Ortalyq Azııadaǵy alǵashqy jáne eń iri hor ujymy sanalatyn B.Baıqadamov atyndaǵy memlekettik hor kapellasynyń bilikti mamandary tálim bermek. Kásibı mýzykanttar halyq ánderin úıretýmen qatar, hor janrynyń qyr-syrymen jan-jaqty tanystyrý arqyly jastardyń mádenıet pen ónerge degen yntasyn oıatyp, olardyń rýhanı damýyna yqpal etýdi kózdeıtinderin aıtady.
– Memleket basshysy Qasym-Jomart Toqaev óz Joldaýynda: «О́skeleń urpaqtyń sporttyq jáne shyǵarmashylyq áleýetine asa nazar aýdarý qajet. «Balalar úıirmesi» qyzmetin qaıta qalpyna keltirgen jón. Onda jastarymyz qolónerdiń jáne shyǵarmashylyqtyń bastapqy negizderimen tanysar edi. Balalar úshin qaterli búgingideı aýmaly-tókpeli zamanda olardyń kúsh-jigeri men qyzyǵýshylyǵyn durys arnaǵa baǵyttaý asa mańyzdy» dep el erteńi sanalatyn óskinderdi ónerge baýlýdyń arnasyn keńitýdi tapsyrǵan edi. Irgeli óner ujymy retinde jastardyń shyǵarmashylyq áleýetin damytyp, kásibı bilim alýyna negiz bolǵymyz keldi. Úıirmeni uıymdastyrýdaǵy maqsatymyz osy, – deıdi Jambyl atyndaǵy Qazaq memlekettik fılarmonııasynyń dırektory Taır Qarataev.
Aldaǵy kúnderi B.Baıqadamov atyndaǵy memlekettik hor kapellasynyń bas dırıjeri ári kórkemdik jetekshisi, Qazaqstannyń eńbek sińirgen qaıratkeri Beıimbet Demeýov úıirmege qatysýǵa ótinish bildirgen jasóspirimder arasynda tyńdaý ótkizip, tańdaý jasaıtyn bolady. Sonymen qatar atalǵan úıirmede arnaıy daıyndyqtan ótken daryndy balalardy iriktep, olardyń qatysýymen keleshekte fılarmonııanyń úlken sahnasynda konsert qoıý jospary qarastyrylǵan.
Búkilodaqtyq baıqaýdyń laýreaty atanǵan Memlekettik hor kapellanyń repertýaryna horǵa óńdelip túsirilgen halyq ánderi, sondaı-aq shyǵarmalardyń iri túrleri – sıýıta, poema, kantata jáne oratorııalar engen. Shyǵarmashylyq áleýeti baı ujymnyń kásibı oryndaý sheberligi jas talapkerlerdi qanattandyratyny sózsiz.
ALMATY