Endi túlekter tek memlekettik mekemelerde ǵana emes, jekemenshik uıymdarda da jumys istep, granttaryn óteı alady. Basty shart – daıyndyq baǵyty (mamandyǵy) boıynsha jumys isteý qajet. Jýyrda Bilim jáne ǵylym mınıstri Ashat Aımaǵambetov túlekter jıi kóteretin másele oń sheshimin tapqanyn aıtty.
«Zańǵa engizilgen jańa norma túrli uıymdardaǵy kadr máselesin sheshýge septigin tıgizedi ári túlekterdiń jumyspen qamtylý múmkindikterin keńeıtýge jol ashady. Mysaly, stýdent aýyldyq kvota arqyly farmasevtıka baǵyty boıynsha oqýyn aıaqtady delik. Keıin ol aýylǵa baryp, óz mamandyǵy boıynsha memlekettik uıymda jumys isteýge mindetti bolatyn. Al aýylda memlekettik dárihana joq bolsa she? Túlektiń qıyn jaǵdaıǵa tap bolatyny anyq. Sondyqtan bul másele de sheshimin tapty. Endigi kezekte grantpen oqyǵan túlek óz daıyndyq baǵyty boıynsha jekemenshik uıymdarda esh kedergisiz jumys isteı alady», dedi mınıstr.
Qazirgi ýaqytta memleket-jekemenshik áriptestik damyp keledi jáne memlekettik tapsyrys jekemenshik balabaqshalarda, mektepter men aýrýhanalarda ornalastyrylyp jatqanyn da eskerý qajet.
Grant arqyly oqýyn bastap, keıin aqyly bólimge aýysatyn azamattarǵa qatysty taǵy bir norma qabyldandy. Keıbir grant ıegerleri memleket shyǵynyn jumyspen óteý rásimin aınalyp ótýdiń amalyn tapqan. Olar grant arqyly úshinshi kýrsqa deıin tegin oqyp, úsh jyl boıy stıpendııa alady. Sodan keıin memlekettik grantty jumyspen ótemeý úshin 4-kýrsta aqyly bólimge aýysatyn. Osyǵan baılanysty memleket jumsaǵan shyǵyndardy óteý boıynsha da talaptar ózgerdi.
«Máselen, stýdent grantta eki jyl oqyp, keıin aqyly bólimge aýysty delik. Bul jaǵdaıda stýdent qansha jyl grantta oqysa, sonsha jyl grantty jumyspen óteýge mindetti bolady. Dál osy norma, aqyly bólimnen grantqa aýysqan stýdentterge de qatysty bolady», dep túsindirdi mınıstr.