«Qazsýshar»RMK 2021 jylǵy sý tasqyny kezeńine daıyndyq boıynsha josparly jumys júrgizýde. Osy baǵytta qandaı sharalar qabyldanyp jatqany týraly Ekologııa, geologııa jáne tabıǵı resýrstar mınıstrliginiń Facebook-tegi paraqshasynda ótken tikeleı efırde «Qazsýshar» RMK bas dırektorynyń orynbasary Erlan Sádýaqasov baıandady.
Onyń aıtýynsha, sý tasqyny qaýpiniń aldyn alý úshin kásiporyn ótken jyldyń kúzinen bastap sý qoımalarynda bos syıymdylyqtar qurý boıynsha jumys júrgizilip keledi.
«Biz bul baǵytta 2020 jyldyń kúzinen bastap jumys istep kelemiz. Sondaı-aq, basseındik ınspeksııalarmen, TJ ókilderimen jáne ákimdiktermen birlesip gıdrotehnıkalyq qurylystardy kózben sholyp tekserý júrgizdik. TJ týyndaǵan jaǵdaıda qurylys jáne basqa da ınertti materıaldardyń, qaptardyń qajetti qorlary daıyndaldy, tıisti arnaıy tehnıka bar, JJM daıyndaldy», dedi ol.
Erlan Sádýaqasov «Qazsýshar» RMK balansynda respýblıkalyq menshiktegi 4 953 sý sharaýashylyǵy jáne gıdromelıoratıvtik obektiler, onyń ishinde 86 sý qoımasy, 84 sý toraby, 36 bóget, 103 sorǵy stansasy, 46 bas qurylys, 3 298 kanal jáne basqa da sý sharýashylyǵy obektileri bar ekenin jetkizdi.
«Barlyq sý qoımalary bekitilgen kestege sáıkes iske qosý rejiminde jumys isteıdi jáne kóktemgi sý tasqynyn qabyldaýǵa arnalǵan syıymdylyq qory bar. Ony jobalyq kólemge deıin toltyrǵan jáne úlken tasqyn sýlar kelgen jaǵdaıda tranzıttik rejimde jumys isteıtin bolady», dep habarlady Qazsýshar basshysynyń orynbasary.
E.Sádýaqasov Qazaqstanda sý tasqyny kezeńi ońtústik óńirlerdi qospaǵanda, naýryz aıynyń basynda bastalatynyn, al erigen sý aqpannyń basynda keletinin atap ótti. Sý tasqyny maýsymynyń sátti ótýi aýa-raıy jaǵdaıyna jáne sý tasqynyna qarsy ýaqtyly qabyldanǵan sharalarǵa tikeleı baılanysty.
«Aqpan aıynda Qazgıdromet ylǵal qorynyń kólemi men topyraqtyń qatý tereńdigi týraly aqparatty usynady. Bul kóktemgi sý tasqyny qaýpi bar aımaqtardy anyqtaıdy. Sondaı-aq, olardyń málimetteri negizinde biz sý qoımalarynyń jumys rejimin túzetemiz. Bul qaýipti gıdrologııalyq qubylystardy der kezinde anyqtaý, gıdrotehnıkalyq qurylystardyń jaǵdaıyn baqylaý úshin jasalady», dep túıindedi ol.