Qazaqstandyqtar «budan bylaı WhatsApp jelisinde barlyq jeke hat almasý men jeke derek úshinshi tulǵalarǵa qoljetimdi bolýy múmkin jáne qońyraýlar jazylady» degen habarlama taratty. Aqparattyń ras-ótirigin Stopfake.kz jýrnalısteri anyqtady, dep habarlaıdy Egemen.kz
2020 jylǵy jeltoqsanda WhatsApp derekterdi óńdeýdegi ózgerister týraly málimdeme jasady. Biraq onda paıdalanýshylardyń jeke aqparatyn úshinshi tulǵalarǵa berý qarastyrylmaǵan. Degenmen paıdalanýshylar jańa erejelerdi qabyldaýǵa tıis ekenderine alańdaǵan. Sebebi, kelispegender messendjerde buǵattalatyn boldy.
Basylym málimetinshe, bul narazylyq týdyryp, adamdar qosymshany paıdalanýdan jappaı bas tartty. Mundaı reaksııa nátıjesinde WhatsApp ıesi Facebook ákimshiligi jańashyldyqty engizýdi keıinge qaldyrdy. WhatsApp blogyndaǵy aqparatqa sáıkes, 8 aqpanda, buryn habarlanǵandaı, kelispegen paıdalanýshylardyń akkaýnttary buǵattalmaıdy.
«Biz WhatsApp-taǵy qupııalylyq pen qaýipsiz qatynas qaǵıdalary týraly shyndyqqa janaspaıtyn qaýesetterdi joıý úshin jumys isteımiz. Sodan keıin kompanııalar úshin jańa múmkindikter paıda bola bastaǵan kezde paıdalanýshylarymyzǵa birtindep 15 mamyrǵa deıin jańa saıasatpen tanysýdy usynamyz», delingen habarlamada.
Qoryta aıtqanda, úshinshi taraptardyń WhatsApp qoldanýshylarynyń jeke hat-habarlaryna zańdy túrde qoljetkize alatyny týraly habarlamalar jalǵan.