Búgin oblys ákimi Gúlshara Ábdiqalyqova eńbek ardageri, Sosıalıstik Eńbek eri Arapbek Ábıevpen kezdesip, 80 jas mereıtoıymen quttyqtady.
- Syr ólkesinde elimiz úshin aıanbaı eńbek etip, óziniń adaldyǵymen, parasattylyǵymen erekshelengen azamattarymyz barshylyq. Solardyń biri Arapbek Ábıev aǵamyz bıyl mereıli 80 jasqa tolyp otyr. Sizdi Syr óńiri jurtshylyǵynyń atynan mereıtoıyńyzben shyn júrekten quttyqtaımyz!, - dedi oblys ákimi.
Arapbek Ábıev 1941 jylǵy 9 qańtarda Qyzylorda oblysy, Jańaqorǵan aýdanynda dúnıege kelgen. Jańaqorǵandaǵy №17 kásiptik-tehnıkalyq ýchılısheni bitirip, dala akademıgi atanǵan kúrishshi Ybyraı Jaqaevtyń mektebinen ótken.
1968-1977 jyldary kúrish zvenosynyń jetekshisi bolyp, 1978-1994 jyldary brıgada basqardy, 1994-1997 jyldary keńshar dırektorynyń sharýashylyq jónindegi orynbasary boldy. Alǵashqy jyldan bastap kúrishten mol ónim jınap, ozat dıqan atandy.
Aýylsharýashylyǵy salasynyń damýyna qosqan úlesi úshin Sosıalıstik Eńbek eri ataǵyn aldy. Búkilodaqtyq aýyl sharýashylyq jetistikteri kórmesiniń kúmis jáne altyn medaldarymen marapattaldy.
Sharada aımaq basshysy mereıtoı ıesine Syr eliniń áleýmettik-ekonomıkalyq damýyna sińirgen eńbegi úshin oblystyń eń joǵary nagradasy – Qyzylorda oblysynyń Qurmet gramotasyn tabystap, halqymyzdyń dástúri boıynsha ıyǵyna shapan japty.
Shara sońynda mereıtoı ıesi Arapbek Ábıev kórsetilgen qurmetke rızashylyǵyn bildirdi.