Bul kúnderi sý dobynan Italııada ótip jatqan Olımpııa oıyndarynyń irikteý týrnırinde Qazaqstannyń áıelder quramasy sátsiz óner kórsetýde.
Jarystyń ekinshi aınalymynda jerlesterimiz Majarstan quramasymen sheberlik baıqasty. Bul komanda óte azýly. Olardyń eki dúrkin álem jáne úsh dúrkin Eýropa chempıony degen ataǵy bar. Aıtýly dodalarda majarstandyqtar san márte kúmis jáne qola medaldi moıyndaryna ildi. Qatarynan sońǵy úsh Olımpıadada tórtinshi orynǵa taban tiredi. Aıtqandaı-aq, bul básekede qarsylastarymyzdyń basymdyǵy anyq baıqalyp, olar 23:6 esebimen jeńiske jetti. Qazaqstandyq vaterpolshylar arasynan Anastasııa Muratálıeva eki gol soqsa, Darıa Roga, Anastasııa Eremına, Vıktorııa Hrıtankova jáne Anna Týrova bir-bir retten nysanany dál kózdedi.
Esterińizge sala keteıik, bizdiń arýlar Italııadaǵy týrnırdiń tusaýkeser kezdesýinde de utylǵan bolatyn. Jerlesterimz Grekııaǵa 5:13 esebimen ese jiberdi. 21 qańtarda qazaqstandyqtar Izraıl quramasymen kúsh synasady.