Nur-Sultannyń «Barysy» Qurlyqtyq hokkeı lıgasynyń (QHL) kezekti týr oıynyn Helsınkıde «Iokerıt» komandasymen ótkizdi.
Eki ujym arasyndaǵy alǵashqy oıyn ótken jyldyń qazanynda Nur-Sultanda ótip, sol básekede qonaqtar «Barysty» 5:4 nátıjesimen overtaımda qapy qaldyrǵan bolatyn. Helsınkıge elordadaǵy ketken eseni qaıtarýǵa barǵan jerlesterimiz óz degenderine jetti. Birinshi kezeńde komandalar bir-biriniń qaqpa kiltin uzaq ýaqyt taba almady. Desek te 19-mınýtta «Barystyń» kanadalyq legıoneri Fılıp Varone esep ashty. Úzilisten keıin de eki jaq biraz tireskenimen, shaıba soǵa almady.
Úshinshi kezeńde aıdyn ıelerinen Aleks Grant (42-mınýt) esepti teńestirýge múmkindik alǵanymen, bul shaıba «Iokerıttiń» osy oıyndaǵy alǵashqy jáne sońǵy goly boldy. Teń esepti qanaǵat tutpaǵan jerlesterimiz qarqynyn odan ári kúsheıtti. Nátıjesinde, 51 jáne 56-mınýttarda Kıortıs Volk qarsylastyń qaqpasyn eki márte dál kózdese, 59-mınýtta Anton Sagadeev kezdesýdiń núktesin qoıdy. Osylaısha, «Barys» syrt aıdynda «Iokerıt» ujymynan ese qaıtaryp, 4:1 esebimen jeńiske jetti. Elorda komandasy kelesi kezdesýin búgin Máskeýde «Dınamo» klýbymen ótkizedi.