Oral qalasynda joǵalyp ketken jeti jasar bala tabyldy, dep habarlaıdy Egemen.kz
BQO polısııa departamentiniń baspasóz qyzmeti málim etkenindeı, oqıǵa 24 qańtar kúni Eski áýejaı aýdanynda oryn alypty. Jeti jasar bala shamamen saǵat 14.00-de úıinen shyǵyp ketkennen qaıta oralmaǵan. Úlken uly kishkentaıynan ózi derbes júrip úırengendikten, anasy kúdiktene qoımapty. Tek kesh túsip, balasy kelmegennen keıin saǵat 19.23-te polısııaǵa shaǵymdanǵan. Áıel ulyn ózi izdeýge múmkindigi bolmaǵan. О́ıtkeni joldasy uzaq ýaqyt boıy vahtalyq ádispen jumys isteıtindikten, 32 jastaǵy áıel úsh balasyna kóbine ózi bas-kóz bolyp kelipti. Polısııaǵa shaǵym túsken boıda ıývenaldy polısııa bólimshesiniń jeke quramy aıaǵynan tik turdy.
BQO polısııa departamentiniń barlyq bólimshelerine, eriktilerge baǵyt berildi. Izdestirý sharalary barysynda ıývenaldy polısııa bólimshesiniń ınspektory, polısııa kapıtany Samat Spashev bir saǵattaı ýaqyt ótken soń joǵalǵan balanyń qaıda júrgenin anyqtady.
Máseleniń mánisi bylaı bolyp shyqty. Atalǵan otbasy Eski áýejaı aýdanynda jeke úı jaldaǵanyna kóp bolmaǵan. Sondyqtan kórshilerimen tanysyp úlgermegen. Al uldary olardyń balalarymen aralasyp júrgendikten, sol sebepti ata-analary joq kezde úılerine shaqyrǵan.
Bala kórshilerdiń úıinde kúni boıy oınaǵan. Polısııa qyzmetkeri tabylǵan balany anasynyń qolyna tapsyrdy.