Oral qalasynda kópqabatty úıdiń tóbesinen qar kesegi balanyń ústine qulady, dep habarlaıdy Egemen.kz
Blacklist.uralsk Instagram paraqshasynda jazylǵandaı, oqıǵa keshe 5-shaǵynaýdan 7-úı janynda bolǵan. Kúndiz muz aralas qar kesegi oınap júrgen balalardyń ústine qulap ketken.
«Qulaǵan qar oryndyqta otyrǵan balanyń ústine túsken. Ony jedel járdem alyp ketti, tiri, biraq qozǵala almaıdy. Qar sondaı-aq jolda turǵan avtokólikke de tıgen. Kún sál jylynsa, jylda osylaı, tóbeden qar qulaıdy. Osy úı balansyna kiretin PIK tóbedegi qardy tazalaýdy mindet dep sanamaıdy. Saýal kóp: kim tazalaýy tıis, qandaı memlekettik organdar baqylaıdy, qar ustamaıtyn taıǵaq tóbelerdi kim qabyldaǵan, mundaı qaýipti shatyrlardy paıdalanýǵa ruqsat berý máselesin kim qadaǵalaıdy? Árıne, balalardy qaraý kerek. Alaıda kez kelgen adamǵa kireberiske kirerde jáne shyǵarda qaýipti» dep jazylǵan onda.
Oblystyq densaýlyq saqtaý basqarmasy baspasóz qyzmetiniń naqtylaýynsha, jedel járdem saǵat 16.35-te 5-shaǵynaýdandaǵy 5-úıge shaqyryldy. Ústine qar qulaǵan bala oblystyq kópbeıindi balalar aýrýhanasyna jetkizildi, jaǵdaıy ortashadan aýyr.