Búgin Senattyń Ekonomıkalyq saıasat, ınnovasııalyq damý jáne kásipkerlik komıtetiniń keńeıtilgen otyrysy boldy. Onda depýtattar Eýrazııalyq ekonomıkalyq odaq aıasynda qoldanystaǵy birqatar hattamalar men kelisimderdi ratıfıkasııalaýdy talqylady.
Zań jobalarynyń birinde qupııa aqparatty qorǵaý tártibi jáne ony jarııa etkeni úshin jaýapkershilik týraly kelisimge Armenııa Respýblıkasynyń qosylýyn zańdy resimdeý kózdelip otyr. Bul Eýrazııalyq ekonomıkalyq komıssııanyń básekelestiktiń biryńǵaı qaǵıdalarynyń saqtalýyn baqylaýdy júzege asyrýy kezinde erekshe mańyzdy.
«Armenııa Respýblıkasynyń kelisimge qosylýy transshekaralyq naryqtardaǵy básekelestiktiń jalpy qaǵıdalarynyń buzylýy týraly ótinishterdi qaraý, tergeý júrgizý jáne isterdi qaraý barysynda Eýrazııalyq ekonomıkalyq komıssııanyń jáne Eýrazııalyq ekonomıkalyq odaqqa múshe memleketterdiń monopolııaǵa qarsy organdarynyń barlyq laýazymdy tulǵalary men qyzmetkerlerine qupııa aqparatty jarııa etkeni úshin jaýapkershilikti teń dárejede qarastyrýǵa múmkindik beredi»,-dep atap ótti komıtet tóraǵasy, senator Dáýren Ádilbekov.
Otyrysta sondaı-aq EAEO men Serbııa Respýblıkasy arasyndaǵy erkin saýda týraly kelisimdi ratıfıkasııalaýǵa qatysty zań jobasy qaraldy. Ol qabyldanǵannan keıin Serbııadan EAEO elderine jáne kerisinshe keıbir taýarlardy ákelýge kedendik bajdar alynyp tastalady, sondaı-aq birqatar júkterdi bajsyz ákelýge kvotalar beriledi.
Senatorlar otyrystyń qaraýyna "2014 jylǵy 29 mamyrdaǵy Eýrazııalyq ekonomıkalyq odaq týraly shartqa ózgerister engizý týraly hattamany ratıfıkasııalaý týraly" zań jobasyn da engizdi.
«Onda EAEO shartynyń termınologııasy naqtylanady, sondaı-aq avans tólemderdi kedendik ákelý, arnaıy, dempıngke qarsy, ótemaqy bajdaryn tóleý esebine esepke alý múmkindigine qatysty olqylyqtar joıylady», - dep atap ótti Senat depýtaty Lázzat Rysbekova.