Elordadaǵy Prezıdenttik klınıkada medısına ǵylymdarynyń doktory, ýrologııa jáne andrologııa ortalyǵynyń jetekshisi, «Reseı Federasııasynyń Memlekettik ǵylymı ortalyǵy – A.I.Býrnazıan atyndaǵy Federaldy medısınalyq bıofızıkalyq ortalyq» federaldy memlekettik bıýdjettik mekemesiniń ýrologııa jáne andrologııa kafedrasynyń professory, ýrolog Pavel Kyzlasovtyń úrpi jáne ermúshe hırýrgııasy boıynsha aılyq sheberlik synyby ótip jatyr.
Sheberlik saǵaty dárister serııasyn jáne mıkrohırýrgııalyq daǵdylardy talap etetin birqatar kúrdeli operasııany júrgizýge jáne aýyz qýysynyń shyryshty qabyǵyn qoldaný arqyly almastyrǵyshtardy jasaýǵa baǵyttalǵan.
О́kinishke qaraı, Qazaqstanda ártúrli patologııalardan zardap shegetin jáne kúrdeli rekonstrýksııalyq operasııalarǵa muqtaj pasıentter kóp.
– Shyn máninde, bul andrologııa jáne úrpi men jynys múshesine jasalatyn operasııalarmen baılanysty óte ózekti jáne mańyzdy másele, – deıdi Prezıdenttik klınıkanyń ýrolog dárigeri Baqtııar Qasymov. – Aıta ketý kerek, bizdiń «andrologııalyq» ortamyzda bul aspekt onsha damymaǵan. Biz mundaı pasıentterge hırýrgııalyq operasııalardyń tolyq arsenalyn usyný deńgeıine jetpedik.
Nur-Sultanǵa kelgennen keıin Pavel Sergeevıch sheberlik synyby úshin kóptegen jaǵdaıy kúrdeli pasıentterdi iriktep alǵanyn, keıinnen oqytý nátıjesine oń áser etkenin atap ótti.
– Mundaı pasıentter neǵurlym kóp bolsa, dárigerlerdiń túrli ádistemeler men operasııalyq aralasýlardyń varıasııalaryn kórý múmkindigi soǵurlym joǵary bolady, – dedi ol.
Osylaısha, sheberlik synyby barysynda birqatar kúrdeli operasııa júrgizildi, onyń keıbiri Nur-Sultanda alǵash ret ótkizilip otyr.
Pasıentterdiń biri – nesep shyǵarý joly tarylǵan er adam boldy.
– Jaqynda biz úrpisi shamamen 15 sm-ge tarylǵan pasıentke operasııa jasadyq, deıdi Pavel Sergeevıch. – Er adamnyń týa bitken úrpi patologııasy bolǵan. Bala kezinde oǵan operasııa jasap, syrtqy qabaty túkti uma terisi paıdalanylǵan. Keıinnen túkterde tastar paıda bolyp, olar pasıenttiń zár shyǵarýyna kedergi keltirgen. Bul jaǵdaıdy túzetý jáne naýqastyń ómir súrý sapasyn jaqsartý úshin, biz jińishke jambas bulshyqeti men aýyz qýysynyń shyryshty qabyǵyn qoldana otyryp, rekonstrýksııa jasadyq.
Dárigerdiń aıtýynsha, bul ádister jergilikti tinder bolmaǵan kezde qan aınalymdy jáne úrpi tútigin jetkilikti etý úshin qoldanylady. Sondaı-aq, Baqtııar Ǵalıuly týa bitken aýrýdyń gıpospadııasynan zardap shekken pasıent týraly áńgimeledi.
– Bul patologııa úrpi tesiginiń durys ornalaspaýymen sıpattalady, – deıdi dáriger. Pasıent nesep jolynyń jynys múshesiniń basynda emes, dińinde ornalasqandyǵynan zardap shekken.
Pasıent bul operasııany bala kezinde jasaý kerek bolǵany, biraq túrli sebeppen keıinge qaldyryla bergenin eske aldy.
– Bıyl osy qadamǵa bel baılap, Baqtııar Ǵalıulyna júgindim. Maǵan portal arqyly tegin operasııa jasady, dedi pasıent.
Qazirgi ýaqytta barlyq pasıentter qalpyna kelý satysynan ótip jatyr. Olar operasııadan keıingi kezeńde muqııat jáne jiti baqylaýdy qajet etedi.
– Qazirgi kezde bizdiń óz kózimizben kórýge, qandaı ozyq tehnologııalar paıdalanylyp jatqanyn bilýge jáne halyqaralyq usynystardy qoldanýǵa tamasha múmkindigimiz bar. Sheberlik synyptyń uzaq merzimdi perspektıvasy – Qazaqstandaǵy barlyq muqtaj pasıentke qoljetimdi jáne joǵary sapaly medısınalyq kómek kórsetý úshin hırýrgııanyń osy baǵytyn damytý qajet. Biz osyndaı aýrýlardan zardap shegetin naýqastarǵa shetelge barmaı, óz elimizde tolyq kómek kórsetýge qabiletti ortalyqqa aınalǵymyz keledi, – dep qorytyndylady №4 hırýrgııa bólimshesiniń meńgerýshisi Erlan Eńsebaev.