Senattyń Áleýmettik-mádenı damý jáne ǵylym komıtetiniń músheleri elimizdiń Mádenıet jáne sport mınıstrimen kezdesti. El Prezıdentiniń «Jańa jaǵdaıdaǵy Qazaqstan: is-qımyl kezeńi» atty Joldaýyn iske asyrý aıasynda arhıvter men kitaphana qorynyń jaı-kúıi, qoljazbalardy, sırek kezdesetin kitaptar men qundy qujattardy sıfrlandyrý kún tártibindegi basty másele boldy, dep habarlady osy palatanyń baspasóz qyzmeti.
Kezdesýdi senator, komıtet tóraǵasy Murat Baqtııaruly júrgizip otyrdy.
Mádenıet jáne sport mınıstri Aqtoty Raıymqulova depýtattardyń saýaldaryna jaýap bere kelip, elimizdiń kitap qory men kitap qoımalarynyń jaı-kúıi, sondaı-aq kitaphanashylar men muraǵat qyzmetkerleriniń jalaqysy týraly egjeı-tegjeıli aıtyp berdi.
Senator Nurtóre Júsip osy máselege baılanysty elimizde arhıvterdi damytýǵa jetkilikti kóńil bólinbeıtinin, sondyqtan olardyń jaǵdaıy qazirgi zamanǵy standarttarǵa sáıkes kelmeıtinin atap ótti. Bul salada mamandar jetispeýshiligi de ótkir máselege aınalyp otyr.
Senator kitaphanalarda erekshe qajettilikteri bar adamdarǵa qajetti jaǵdaılar jasalmaǵanyna nazar aýdardy. «Kózi kórmeıtin jáne nashar kóretin adamdarǵa arnalǵan kitaphanalarǵa erekshe nazar aýdarý qajet. 46,5 myń zaǵıp jáne nashar kóretin azamattardyń elimizdiń qoǵamdyq-saıası ómirine aralasý jáne laıyqty bilim alý quqyqtary shektelmeýi tıis», dedi ol.
Jınalǵandar tarıhı mańyzdy qoljazbalardyń, sırek basylymdar men kitaptardyń kóshirmelerin izdeý men satyp alýdy qarjylandyrýdyń mańyzdylyǵy týraly aıtty. Kezdesý sońynda senatorlar mádenıet qyzmetkerleriniń jalaqysyn kóterý máselesin qarastyrý jáne sırek kitaptar men qoljazbalar saqtalatyn Ulttyq ortalyq qurýdy usyndy.