Elordanyń «Barys» klýby Qurlyqtyq hokkeı lıgasyndaǵy (QHL) tórt oıynǵa sozylǵan jeńisti jolyn jalǵastyra almady. Kezekti týr oıynyn elordadaǵy «Barys-Arenada» ótkizgen jerlesterimiz Chelıabiniń «Traktorynan» jeńilip qaldy.
Kezdesýdiń alǵashqy 20 mınýty óte tartysty ótkenimen, aıdyn ıelerine qaraǵanda qonaqtar alǵashqy kezeńde basym boldy. Nátıjesinde, 11-mınýtta Alekseı Byvalsev «Barys» qaqpasyn dál kózdedi. Ekinshi kezeńniń orta tusynda Egor Petýhov (32-mınýt) esepti teńestirdi. Biraq qazaqstandyq jankúıerlerdiń qýanyshy uzaqqa sozylmady. Arada eki mınýt ótkende qonaqtar qaqpamyzǵa qatarynan eki shaıba soǵyp, tablodaǵy kórsetkishti 3:1-ge jetkizdi. 33-mınýtta Sergeı Kalının «Traktordy» esepte qaıta alǵa shyǵarsa, 34-mınýtta Vıtalıı Kravsov komandasynyń úshinshi shaıbasyn soqty.
Úshinshi kezeńde «Barys» esep aıyrmasyn taǵy da qysqartqanymen, qarsylastarynan jeńisti julyp alýǵa shamasy jetpedi. «Barystyń» oıyndaǵy sońǵy golyn 52-mınýtta Valerıı Orehov saldy. Qorytyndy esep – 2:3.
Elordalyq klýb óziniń kelesi kezdesýin búgin Nıjnekamskiniń «Neftehımıgimen» ótkizedi.