О́tken apta sońynda áleýmettik jelilerde Qyzylorda qalasynda bir oqýshynyń koronavırýs indetinen qaıtys bolǵany jaıly jazba jarııalanǵan edi. Osyǵan baılanysty dúısenbi kúni oblystyq densaýlyq saqtaý, bilim basqarmalary basshylary brıfıng ótkizip, oqıǵanyń jaı-japsaryn aıtyp berdi.
Densaýlyq saqtaý basqarmasynyń basshysy Sábıt Pazylovtyń aıtýynsha, 5 qańtardan bastap mektep oqýshysynyń ystyǵy kóterilip, ózin jaısyz sezine bastaǵan eken. 10 qańtar kúni №5 emhanaǵa qaralyp, oblystyq juqpaly aýrýlar aýrýhanasyna jatqyzylady. Osy emdeý mekemesinde alynǵan PTR-test teris nátıje bergen soń, 19 qańtar kúni balalar aýrýhanasyna aýystyrylypty. Bul jerde alynǵan synama da bala boıynda koronavırýs ınfeksııasynyń joqtyǵyn kórsetken. Respýblıkadaǵy basqa da tájirıbeli mamandarmen aqyldasa otyryp, qoıylǵan basqa dıagnoz da anyqtalmapty. Neshe kúngi emnen keıin de ońalmaǵan 10 jastaǵy bala 24 qańtar kúni kóz jumdy. Oǵan dárigerler «ókpe, júrek jetkiliksizdigi» degen dıagnoz qoıyp otyr.
Oblystyq bilim basqarmasynyń basshysy Aqzıra Qasymova qaıtys bolǵan mektep oqýshysynyń Qyzylorda qalasyndaǵy №8 P.Osıpenko atyndaǵy mekteptiń 4-synybynda oqyǵanyn aıtyp ótti.
– Bala I toqsannan bastap onlaın formatta, qashyqtan oqyp kelgen. Oqý úlgerimine qatysty problema týyndaǵan emes. Qashyqtan oqytýǵa baılanysty elektrondy tehnıkamen qamtylǵan. Bala aýyrǵannan bastap, synyp jetekshisi otbasymen únemi habarlasyp, jaǵdaıyn bilip otyrǵan, – deıdi basqarma basshysy.
Brıfıngte basqarma basshysy mektepterdegi oqý prosesin uıymdastyrý bas memlekettik sanıtarlyq dárigerdiń qaýlysy negizinde júrgiziletinin jetkizdi. Bilim berý uıymdarynda sanıtarlyq talaptar tolyq saqtalǵan. Dástúrli túrde oqıtyn balalar 5 satylyq dezınfeksııalyq tekserýden ótedi. Mektepke ata-analardyń kirýine tyıym salynǵan. Oqýshylardyń da shoǵyrlanbaýy udaıy qadaǵalanyp otyrady. Oblys boıynsha qazir 89 258 oqýshy qashyqtan, 80 636 shákirt dástúrli formatta bilim alýda.
Jalpy, oqý jyly bastalǵaly beri 22 oqýshy kovıdke shaldyǵypty. Onyń 6-ýy dástúrli túrde kezekshi synyptarda bilim alatyndar qatarynan anyqtalsa, 16-sy qashyqtan oqıtyndar arasynan shyǵyp otyr.
Jýrnalıstermen kezdesýde oblystyq densýlyq saqtaý basqarmasynyń basshysy Sábıt Pazylov pen bas memlekettik sanıtarlyq dáriger Álııa Ábdiqaıymova óńirdegi epıdemııalyq ahýal jaıly da baıan etti. Osy kúnge deıin oblysta 3 544 naýqas tirkelgen, aptanyń alǵashqy kúni taǵy 9 jaǵdaı anyqtalyp otyr. Indetke shaldyqqandardyń 96,6 paıyzy emdelip shyǵypty. Qazir ınfeksııalyq stasıonarda 38 naýqas em alýda, onyń 4-ýi jansaqtaý bólimine jatqyzylǵan.
Aqpan aıynda oblys turǵyndaryn erikti vaksınalaý bastalady. Vaksınany saqtaýdyń temperatýralyq rejimin eskerip, bastapqy medısınalyq kómek kórsetý medısınalyq uıymdary men №6 qalalyq emhananyń bazasynda ornalasqan vaksına saqtaý qoımasyn qajetti muzdatqyshtarmen jabdyqtaý úshin jergilikti bıýdjet esebinen qosymsha qarajat bólindi. Ekpe salýdyń birinshi kezeńinde oblysqa 80 000 doza vaksına jetkizý josparlanyp otyr.
Qyzylorda