Memlekettik kirister komıteti «e-Salyq Azamat» mobıldi qosymshasyndaǵy «qyzmetkerdiń eńbegine aqy tóleý» servısin iske qosty, ol qyzmetkerge eseptelgen jeke tabys salyǵynyń, zeınetaqy jarnalarynyń, mindetti áleýmettik aýdarymdardyń jáne medısınalyq saqtandyrýǵa áleýmettik aýdarymdardyń somalaryn qaraýyna múmkindik beredi, dep habarlaıdy Egemen.kz.
Servıs 2020 jyldyń 1 toqsanynan bastap salyq kezeńderi boıynsha qoljetimdi.
Derekterge qoljetkizý úshin elektrondyq sıfrlyq qoltańba arqyly nemese SMS parol arqyly sáıkestendirýden ótý qajet. SMS mobıldi azamattar bazasynda (HQKO) tirkelgen uıaly telefon nómirine túsedi.
Derekterdi qaraý úshin «Salyq ámııany», «Qyzmetkerdiń eńbegine aqy tóleý» bóligine ótip, jyl men kezeńdi tańdaý qajet.
Bastapqy kezeńde myna jeke tulǵalar atalǵan derekterdi qaraı alady:
- jumys berýshiler bıýdjetpen esep aıyrysý kezinde jalpyǵa birdeı belgilengen rejımdi qoldansa;
- nemese jumys berýshiler ońaılatylǵan deklarasııa negizinde arnaıy salyq rejımin qoldansa.
Málimetter bolmasa nemese derekter sáıkes kelmese, salyq eseptiligin túzetý úshin jumys berýshige júginý qajet.
MKK «E-Salyq Azamat» tegin mobıldi qosymshasyn «App Store» nemese «Play Market» - ten júkteýge bolatynyn eske salady.