2021 jyldyń 27 jáne 28 qańtarynda Bas Prokýror Ǵızat Nurdáýletov Almaty oblysy men Almaty qalasynda boldy, dep habarlaıdy Egemen.kz Bas prokýratýranyń baspasóz qyzmetine silteme jasap.
Qadaǵalaý vedomstvosynyń basshysy prokýrormen prosestik sheshimderdi kelisýdiń jańa tártibi boıynsha quqyq qorǵaý organdarynyń jumysyn uıymdastyrý men ózara is-qımylyn tekserdi.
Ishki ister mınıstriniń orynbasarymen birge eki óńirdiń prokýratýra jáne polısııa basshylarymen kezdesý ótkizdi.
Ǵızat Nurdáýletov qabyldanǵan sheshimderdi qadaǵalaýdyń elektrondyq formatynyń ýaqytty únemdeıtinin jáne qylmystyq prosestiń ashyqtyǵyn qamtamasyz etetinin atap ótti.
«Biz birge Prezıdenttiń polısııa, prokýratýra jáne sot arasynda jaýapkershilik aımaqtaryn naqty bólý jónindegi tikeleı tapsyrmasyn oryndaımyz.
Osy formatta bir aıǵa jýyq ýaqyt jumys istep kelemiz. Onyń oń nátıjesin, árıne, qazirdiń ózinde kórip otyrmyz. Qatelikterdiń, buzýshylyqtardyń az bolýymen, sáıkesinshe, proseske qatysýshylardyń shaǵymdarynyń alǵysharttaryn azaıtamyz.
Basty mindet - azamattarymyzdy qylmyskerlerden qorǵaýdy qamtamasyz etý jáne sonymen birge zańsyz aıyptaýǵa jol bermeý», - dedi Bas Prokýror.
Prokýrorlarǵa qylmystyq proseste qadaǵalaýdy kúsheıtý, buzýshylyqtarǵa prınsıpti túrde den qoıý jáne barlyq quqyq qorǵaý organdaryn úılestirýdi jolǵa qoıý tapsyryldy.
Esterińizge sala keteıik, 2020 jylǵy 31 jeltoqsannan bastap prokýrorlar kúdikti dep taný, onyń áreketin saralaý, qylmystyq isti úzý jáne toqtatý týraly tergeý sheshimderin kelisedi, sondaı-aq teris qylyqtar boıynsha hattamalardy bekitedi.
Bul Memleket basshysynyń «Jańa jaǵdaıdaǵy Qazaqstan: is-qımyl kezeńi» Joldaýyn oryndaý aıasynda júzege asyrylatyn qylmystyq prosestiń úsh býyndy modeline kóshýdiń bastapqy kezeńi.
Barlyq novellalar qylmystyq orbıtaǵa túsken azamattardyń konstıtýsııalyq quqyqtaryn saqtaý kepildikterin kúsheıtýge baǵyttalǵan.