Búgin «Qoshqar ata» qaldyq qoımasyn qalpyna keltirý prosesin jandandyrý týraly máselege núkte qoıyldy. Jumystar aldymyzdaǵy 1-2 aıda bastalady dep kútilýde. Bul týraly ekologııa mınıstri Maǵzum Myrzaǵalıevtiń Mańǵystaý oblysyna jasaǵan sapary kezinde aıtyldy, dep habarlaıdy Egemen.kz.
Mańǵystaý oblysy ákiminiń orynbasary Baqytjan Qashaqov pen Mańǵystaý oblysy tabıǵı resýrstar jáne tabıǵat paıdalanýdy retteý basqarmasynyń basshysy Dúısen Qusbekov mınıstrdi qalpyna keltirý boıynsha jumys josparymen tanystyrdy. Mınıstr radıoaktıvti ári ýly kól máselesin sheshýdi keshiktirmeý kerek ekenin jáne prosesti jaqyn arada bastaý qajettigin aıtty. Sebebi, «Qoshqar Ata» jaqyn mańdaǵy eldimekender turǵyndary úshin aıtarlyqtaı zııan keltiredi.
Mamandardyń aıtýynsha, qalpyna keltirý prosesi shamamen 3 jylǵa sozylady. Búgingi kúni «Qoshqar ata» qaldyq qoımasynyń aınalasynda jasyl qorǵanysh aımaǵyn qurý boıynsha jumys júrgizilýde. 2015 jyldan 2020 jylǵa deıin 239 myńǵa jýyq sekseýil kóshetteri otyrǵyzyldy. Bul jumystar ýly kóldiń jaǵalaýy jasyl jelektermen tolyq qorshalǵanǵa deıin jalǵaspaq. Qosymsha taǵy 40 ga kóshet otyrǵyzýǵa konkýrs jarııalandy.
Esterińizge sala ketsek, qalpyna keltirý jumystaryn júrgizýge konkýrs 2019 jyldyń jeltoqsan aıynda jarııalanǵan bolatyn. Sol kezde memlekettik satyp alý boıynsha konkýrsty ótkizýdiń zańdylyǵyna qatysty másele týyndady. Sot prosesinen keıin Joǵarǵy Sot alqasynyń qaýlysymen berilgen kassasııalyq shaǵymdar qanaǵattandyryldy. Endi bul jumystardy atqarýǵa «Pavlodarskıı rechnoı port» AQ jumysqa kirisedi. «Qoshqar ata» qaldyq qoımasy Kaspıı teńizinen 7-8 shaqyrym jáne Aqtaýdan 3-4 shaqyrym qashyqtyqta ornalasqan. Jalpy aýdany 77 km2, qaldyqtardyń aýdany 66 km2 quraıdy.