Shymkent qalasynyń ákimi Murat Áıtenov «Instagram» jelisinde tikeleı efırde turǵyndarmen júzdesti. Qala ákimi aldymen epıdemıologııalyq ahýaldy baıandap, turǵyndar saýaldaryna jaýap berdi. Murat Dúısenbekulynyń efıri bul apta turǵyn úı máselesine arnaldy, dep habarlaıdy Egemen.kz.
Turǵyn úı máselesine qatysty jalpy 389 pikir qaldyrylǵan. Qala ákimi turǵyndar tarapynan kóterilgen suraqtarǵa jaýap berip, salada atqarylǵan jumystar jáne aldaǵy josparlardan habardar etti.
Shymkent qalasynda búginde turǵyn úı kezeginde 42 269 adam tirkelgen. Sońǵy úsh jylda kezekte turǵan adam sany 10 389-ǵa artty. Turǵyn úı kezegine turýdyń óz talaptary men sharttary bar. Kezekke turýǵa nıetti azamattar belgilengen sanattardyń birine ený qajet. Sońǵy 3 jyl kóleminde Shymkent qalasynda tirkelgen bolýy, sońǵy 5 jyl kóleminde atynda turǵyn úı tirkelmeýi shart.
2020 jyldyń qorytyndysy boıynsha qalada arendalyq negizde 1596 páter berildi. Bıyl jospar boıynsha arendalyq negizde 976 páter tapsyrylady (kópbalaly otbasylarǵa – 378, halyqtyń áleýmettik álsiz tobyna – 238, jumys isteıtin jastarǵa – 300, jetim jáne ata-anasynyń qamqorlyǵynsyz qalǵan balalarǵa - 60). 2021 jyly «Jastar» baǵdarlamasy boıynsha 3648 ótinim kelip túsken. 300 páterdi «Jańa Turlan», «Turan», «Asar 2» shaǵynaýdandarynan berý josparlanǵan.
«Nurly jer»baǵdarlamasynyń kredıttik baǵyty boıynsha ótken jyly 2614 páter berildi. Sońǵy úsh jylda 3764 otbasy páter kiltin ıelengen. Osy jyl jospar boıynsha kredıttik negizde 2186 páter berý josparda: 350 páter – «2-10-20» («Baqytty otbasy»), 1728 páter – «5-10-20» («Shańyraq» pılottyq baǵdarlamasy) jáne 108 páter – «7-20-25» baǵdarlamasy.
– Halyqqa qoljetimdilikti arttyrý jáne turǵyn úı berý salasynda sybaılas jemqorlyqqa jol bermeý maqsatynda ákimdik tarapynan qyzmetterdi avtomattandyrý jumystary basty nazarǵa alynyp otyr. Turǵyn úı berý joldaryn halyq arasynda keńinen nasıhattaý úshin medıa jospar bekitiledi. Búginde turǵyn úı kezegin E-gov portalynan jáne turǵyn úı basqarmasynda ashylǵan ózine ózi qyzmet kórsetý buryshynan bilýge bolady. Sondaı-aq, jumyspen qamtý ortalyqtarynda osyndaı qyzmet buryshtaryn ashýdy tapsyrdym, – dedi qala ákimi.
Efır sońynda qala ákimi turǵyndardy saqtyq sharalaryna mán berýge shaqyra kele, kelesi aptadaǵy efır taqyrybyn turǵyndardyń tańdaǵanyn qalady. Iаǵnı qoǵamdaǵy kóp qordalanǵan taqyrypty halyq ózi tańdamaq.