Informburo.kz aqparattyq-saraptamalyq ınternet portalynyń bas redaktory Mıhaıl Dorofeev qaıtys boldy, dep habarlaıdy Egemen.kz.
QR Aqparat jáne qoǵamdyq damý mınıstri Aıda Balaeva tanymal qazaqstandyq jýrnalıst Mıhaıl Dorofeevtiń qaıtys bolýyna baılanysty onyń jaqyndaryna, týystaryna jáne áriptesterine kóńil aıtty.
«Búgin tanymal BAQ-tardyń biri informburo.kz jetekshisi, ulttyq qoǵamdyq senim keńesiniń múshesi, jarqyn ári daryndy adam Mıhaıl Dorofeevtiń ómirden ozǵanyn estidim. Mıhaıldi jeke tanıtyn edim, onyń ómirden ozýy – otandyq jýrnalıstıka úshin óte aýyr qaza. Onyń kóptegen dostary boldy, bári ony jaqsy kórdi jáne qurmettedi, kásibı jáne adamı qasıetterin qadirledi. Bárimiz ony saǵynatyn bolamyz. Jeke óz atymnan jáne Aqparat jáne qoǵamdyq damý mınıstrliginiń atynan Mıhaıl Dorofeevtiń týystary men jaqyndaryna jáne áriptesterine qaıǵyra kóńil aıtamyn», - dep jazdy Aıda Balaeva Facebook jelisinde.
M. Dorofeev jýrnalıstıkadaǵy jolyn Atyraý oblysynda bastap, respýblıkalyq medıada – KTK telearnasynda, «Ekspress K», «Gorod» jáne «Megapolıs» gazetterinde (bas redaktordyń orynbasary) jalǵastyrǵan. Respýblıkalyq telearnalarda basshylyq qyzmetter atqardy, onyń ishinde «Astana q. televızııasy» JShS Bas dırektory jáne «Era» telekompanııasy» JShS bas prodıýseri bolyp jumys istegen. Ár jyldary «Portret nedelı» (KTK), «Formýla lıchnostı» (Qazaqstan, Astana-TV), «Tema» («Astana» telearnasy), «Otkrytyı dıalog» (Habar) televızııalyq baǵdarlamalarynyń júrgizýshisi boldy.