Shymkentte koronavırýsqa qarsy «Spýtnık V» ekpesimen erikti túrde vaksınasııalaý naýqany bastaldy. Bul úshin qalaǵa atalǵan vaksınanyń 1000 dozasy jetkizildi, dep habarlaıdy Egemen.kz.
Shymkent qalasynyń ákimi Murat Áıtenov qaladaǵy vaksına qabyldaǵan alǵashqylarynyń biri boldy. №3 emhanaǵa baryp, ekpe aldynda dárigerge tekserildi. Qarsy kórsetkishter anyqtalmaǵandyqtan, erikti túrde vaksına saldyrdy. Qazirgi tańda densaýlyq jaǵdaıy jaqsy.
«Spýtnık-V» vaksınasynyń 1000 dozasy qalalyq qan ortalyǵyndaǵy muzdatqysh kameralarda ýaqytsha saqtaý úshin ornalastyrylyp, búgin tańǵy saǵat altyda tórt emhanaǵa jetkizildi. Ekpe egý jumystaryn júrgizý úshin qaladaǵy emhanalardyń bazasynda 4 vaksınasııa kabıneti uıymdastyrylyp, vaksınalardy saqtaýǵa arnalǵan muzdatqyshtar ornatylǵan.
Erikti túrde vaksına egý úshin medısına qyzmetkeriniń tizimi qalyptastyrylǵan. Sonymen qatar medısına qyzmetkerleri úshin vaksınasııalaý boıynsha semınar-trenıgter ótkizilip, qajetti medısına qyzmetkerileriniń barlyǵy oqytýdan ótti.
Vaksınasııalaýǵa profılaktıkalyq egýge qarsy kórsetkishteri joq adamdar jiberiledi. Vaksınasııa aldynda dáriger egýge kelgen adamdy mindetti túrde tekseredi. Aıta ketý kerek, vaksınasııa koronavırýstyń odan ári taralýyna jol bermeıdi jáne qatań lokdaýnnyń jalǵyz balamasy.