Shymkent qalasy ákiminiń orynbasary Maqsut Isahov qaladaǵy qoǵamdyq kólik máselesimen tanysý úshin reıdtik is-sharaǵa qatysty, - dep habarlaıdy Egemen.kz qalalyq ákimdiktiń baspasóz qyzmetine silteme jasap.
Qoǵamdyq kólikterge elektrondy tólem júıesi engizilgennen keıin turǵyndar men kólik qyzmetkerleri arasynda jol aqysy jóninde másele týyndady. Jolaýshylar valıdatorlardyń jıi isten shyǵatyny jáne kondýktorlardyń jol aqysyn qolma-qol aqshamen tóleýdi talap etetini týraly shaǵymdana bastady.
Qala ákimi Murat Áıtenovtyń tapsyrmasyna sáıkes jol aqysyn tóleý boıynsha jańa tártip engizildi. Endi qoǵamdyq kólikterde elektrondy tólem júıesinde tehnıkalyq aqaý bolǵan jaǵdaıda, jolaýshylar tegin júredi.
Shaharda ortalyq pen shalǵaı aýdandarǵa shyǵatyn jolda halyq kóp shoǵyrlanatyn oryndar bar. Olar Nursát shaǵyn aýdanyndaǵy «Gımnastıka», «Hyper house» aıaldamasy, Samal jáne Avtonur bazarlary, Kómesh bulaq (kolos), «Mega Planet» pen «Oblystyq áskerı komıssarııat» aıaldamalary.
Maqsut Pernebaıuly osy aıaldamalardy aralap, turǵyndardy 1 aqpannan bastap «TО́LEM» júıesine qatysty jańa tártippen tanystyryp, jolaýshylardyń osy salaǵa qatysty shaǵymyn tyńdady.
Aıta keteıik, jolaýshylar tólemderdi SMS arqyly tóleýge bolady. Ol úshin qoǵamdyq kólik ishinde kórsetilgen arnaıy kodty 2222 nómirine SMS retinde joldaısyz. Jolaqysy abonenttik birlikten alynatyn bolady.