Aýrýdy asqyndyrmaı, erte satysynda anyqtaý jáne olardyń týyndaýyna áser etetin qaýipti faktorlardyń, olardyń órshýin aldyn alý, halyq densaýlyǵyn nyǵaıtý úshin Qazaqstanda Ulttyq skrınıngtik baǵdarlama engizilgen. Ol halyqtyń nysanaly toptarynyń, ıaǵnı naqty aýrýlar boıynsha belgili bir jas tobyndaǵy deni saý tulǵalardyń jappaı profılaktıkalyq medısınalyq tekserip-qaraýdan ótýdi qarastyrady, dep habarlaıdy Egemen.kz
Skrınıng 2, ıaǵnı 0 jastan 18 jasqa deıingi balalarǵa jáne 30 jastan 70 jasqa deıingi jas sanatyna jasalady. Balalar kámeletke tolǵanǵa deıin jyl saıyn profılaktıkalyq tekserip-qaraýdan ótip turýlary tıis.
Tekserip-qaraý eshqandaı sımptomdar bolmaǵan jaǵdaıda da, óz densaýlyǵyńa degen senimdilik úshin qajet. Skrınıng tegin jasalady. Profılaktıkalyq tekserip-qaraýdy qarjylandyrý Mindetti áleýmettik medısınalyq saqtandyrý qorynyń qarjysy esebinen iske asyrylady, sondyqtan skrınıng ótý úshin saqtandyrylýshy mártebesiniń bolýy qajet.
Sońǵy jyldary skrınıngtik baǵdarlamalardyń keńeıýine baılanysty Qazaqstanda qanaınalym júıesiniń aýrýlary, onyń ishinde egde jáne qartaıǵan jasta júrektiń ıshemııalyq aýrýlarynyń ósý barysy anyqtaldy. Sondyqtan qanaınalym júıesiniń aýrýlaryn anyqtaý boıynsha ambýlatorııalyq-emhanalyq jumystardyń tıimdiligin arttyrý qajet. Eń mańyzdy problemalardyń biri – qant dıabeti aýrýyna shaldyqqandar sanynyń ósýi. Áleýmettik mańyzdy aýrýlar zor ekonomıkalyq zııan keltiredi jáne ómir súrý uzaqtyǵyn tómendetedi. Sonymen qatar erte anyqtaý jáne dıagnostıkalaý men emdeýdiń joǵary tehnologııalyq ádisterin keńinen qoldaný qanaınalym júıesiniń aýrýlary jáne qant dıabetinen bolatyn ólim-jitim kórsetkishterin azaıtýǵa múmkindik beredi.
Osy baǵdarlamany júzege asyrý sheńberinde Kardıologııa jáne ishki aýrýlar ǵylymı-zertteý ınstıtýty toqsan saıyn eresek turǵyndar arasynda qanaınalym júıesiniń aýrýlary jáne qant dıabetin erte anyqtaý úshin halyqtyń nysanaly toptaryna skrınıngtik tekserip-qaralýyna monıtorıng júrgizý jáne oǵan taldaý jasaýdy júzege asyrady.
О́ńirlermen jumys júrgizý bóliminiń basshysy Raýshan Qabykenovanyń aıtýynsha, respýblıkamyzdyń ambýlatorııalyq-emhanalyq uıymdarynyń belsendi jumysynyń nátıjesinde nysanaly tekserilip-qaraýdan ótetinderdiń sany jyl saıyn artyp keledi. Osylaısha, tek 2020 jyldyń 12 aıynda 1,5 mln astam adam, ıaǵnı tekserýge tıisti turǵyndardyń 94%-y qanaınalym júıesiniń aýrýlaryna qaraldy. Halyqtyń nysanaly toptaryn tekserip-qaraýdyń nátıjesinde 65 myńnan astam adamda (4,3%) qanaınalym júıesiniń aýrýynyń erte satysy anyqtaldy, olardyń ishinde 88%-y dıspanserlik esepke alyndy.
«Qant dıabetin erte anyqtaýǵa halyqtyń nysanaly toptaryn tekserip-qaraýdyń jaǵdaıy da osyndaı. Tek 2020 jyly skrınıngpen 1,6 mln. astam adam qamtyldy, bul tekserilýge tıistilerdiń 93%-yn quraıdy. Bul rette 12 myńnan astam qant dıabetimen aýyratyndar (0,78%) anyqtaldy. Olardyń barlyǵyn emhanalar dıspanserlik esepke alyp, turaqty túrde tegin dárimen qamtamasyz etetin bolady», dedi Raýshan Qasymovna.
«Skrınıng densaýlyqqa monıtorıng júrgizýdiń mańyzdy kezeńi, sondyqtan profılaktıkalyq maqsatta ony únemi jáne ýaqytyly ótýdiń mańyzy zor», dep KIA ǴZI bólim basshysy óz oıyn túıindedi.