Álemniń saıası sıpaty ýaqyt ótken saıyn kúrdelenip, birde olaı uıtqyp, birde bylaı uıtqyp, attyń jaly, túıeniń qomynda oınaqtap tursa da, Táńirge táýbe, táýelsiz elimizdiń tutastyǵy men tynyshtyǵy buzylmaı, kók baıraǵymyz bıikte jelbirep tur. Ádette bilimdi, bilikti basshy qaı kezde de jedel sheshim qabyldaı biledi. Halyq únine qulaq asatyn memleket qurýdy qolǵa alyp, bılik pen qoǵam arasynda turaqty dıalog qalyptastyrǵan Prezıdent Qasym-Jomart Toqaev ótken kúnderge jiti úńilip, jetistigimiz qaısy, kemshiligimiz nede – sonyń bárin saraptap, oı eleginen jáne bir ótkizip, táýelsizdiktiń otyz jylyn úsh onjyldyq beleske bólip, oǵan jan-jaqty toqtalyp, júıeli taldaı kelip: «Onyń árqaısysy atqarǵan mıssııasy turǵysynan ǵasyrdyń júgin arqalap tur» dep zor baǵa bere otyryp, túbegeıli qorytyndy jasaǵan.
Ádiletti memleket qurylmaı jer betinde shyndyq saltanat qurmaq emes. Prezıdenttiń «Biz ádiletti qoǵam men tıimdi memleket qurýdy kózdep otyrmyz» degen sózi barsha qaýymnyń erteńge degen senimin arttyryp, qanattandyra tústi.
Zady, basshy batyl bolmaı, qosshy batyr bolmaıdy. Qasym-Jomart Toqaev bılik basyna kelgeli beri oń ózgerister jasalyp jatyr. Shyndyqtyń shymyldyǵy túrilip, áli bir túske ene qoımaǵan quraq kórpe sekildi qazaq qoǵamynyń bet-beınesi aıqyn kórine bastady.
Jeltoqsan kóterilisinde alpaýyt kúshterdiń elge jasaǵan zulmat sumdyǵy men aqyryp teńdik suraǵan kókórim jastarǵa kórsetken qorlyǵy men zorlyǵynyń ashy shyndyǵy kúni búginge deıin aqıqat tilinde ashyq aıtylmaı búrkemelenip kelip edi. Memleket basshysynyń «... azattyqtyń alǵashqy qarlyǵashtary – Jeltoqsan qaharmandarynyń azamattyq erligi laıyqty baǵasyn alyp, josparly túrde nasıhattalýy kerek» deýi tegin emes. Sebebi bunyń arǵy tereń astarynda erlikti baǵalamaý – elge syn degen egeýli naıza ótkir oı jatyr. Osynyń ózinen-aq Prezıdenttiń keýdesinde kósemdikke tán qandaı asaý aǵystar júrip jatqanyn ańǵarý qıyn emes.
Sońǵy jyldary qazaq jerine kóz alartyp, suǵyn qadaǵandar kóbeıip, bul qaı qazaqty da alańdata bastaǵan edi. Prezıdenttiń «jerge baılanysty bárimiz aıqyn biletin jáne buljymaıtyn aqıqat – qazaqtyń jeri eshbir sheteldiktiń menshigine berilmeıdi, eshqashan satylmaıdy» degen berik baılaýy senimin semser etip sertke ustaǵan azamat erdiń sózindeı el qulaǵyna sańqyldap jetip, kósheniń alyp-qashpa jelkeýde sózine birjola núkte qoıǵan-dy.
Ras, qaı adam da dúnıege patrıot bolyp kelmeıdi. Adamdy patrıot etip qalyptastyratyn kúsh: tálim-tárbıe, sapaly bilim, sanaly orta jáne jaýapkershilik. Baýyrjan Momyshuly eshkim batyr bop týmaıdy, batyrdy sıtýasııa jasaıdy degen. Kókjal zaman adamdardy kókjal etpeı qoımaǵan.
Osy oraıda Elbasynyń: «Táýelsizdikti qorǵaý úshin biz tiri bolýymyz kerek, tiri bolý úshin iri bolýymyz kerek, iri bolý úshin bilimdi bolýymyz kerek» degen ataly sózi eske túsedi. Bul ne degen sóz? Bul iri bolmaı, bilimdi bolmaı irgeli elge pana, Táńiri syılaǵan Táýelsizdigimizge qorǵan bola almaımyz degen sóz. Al Prezıdent Qasym-Jomart Toqaevtyń jastardyń boıyna memleketshildik rýhty sińirmeı, memleketimizdiń mereıi ústem bolmaıdy degen maǵynada aıtylǵan ýáji Elbasynyń ataly sózine úılesip, Qazaqstannyń qazirgi saıası júıesi zaman talabyna saı damyp kele jatqanyn aıqyndaı túsedi.
Zamanynda búkil dúnıeni dúr silkindirgen ǵundar nege myqty boldy? О́ıtkeni olar qandaı jaǵdaıda da myzǵymas birlikte ǵumyr keshti. Endeshe, Qasym-Jomart Toqaev memleket basqaryp turǵanda biz bárimiz birgemiz, shaıqalmaıdy irgemiz. El birligi – táýelsizdiktiń berik qorǵany.
Rafael NIIаZBEK,
aqyn, Qazaqstannyń eńbek sińirgen qaıratkeri