Qazaqstanda áleýetti ınvestorlarmen jumys isteýdiń jańa tásilderin engizý usynylady. Bul týraly QR Premer-Mınıstriniń orynbasary – syrtqy ister mınıstri Muhtar Tileýberdi bıylǵy 26 qańtarda ótken Úkimettiń keńeıtilgen otyrysynda QR Prezıdenti Q. Toqaevtyń tapsyrmalaryn oryndaý jónindegi sharalardy talqylaý kezinde Úkimet otyrysynda málimdedi, dep habarlaıdy Egemen.kz.
M. Tileýberdi atap ótkendeı, álemdik ekonomıkadaǵy toqyraýdy jáne ınvestısııalyq sıkldiń tómendigin eskere otyryp, jeke ınvestısııalardy tartýǵa qatysatyn barlyq ınstıtýttardyń tıimdi jáne úılesimdi jumysy erekshe mańyzǵa ıe bolady.
«Osyǵan oraı, jahandyq básekelestiktiń ósýi jaǵdaıynda ınvestısııalardy tartý boıynsha jumysty sapaly jańa deńgeıge shyǵarý maqsatynda, biz áleýetti ınvestorlarmen jumys isteýdiń jańa tásilderin engizýdi jáne ınvestısııalyq jobalardy súıemeldeý boıynsha jumysty kúsheıtýdi usynamyz. QR Premer-Mınıstriniń basshylyǵymen Investısııalyq jobalardy jedel túrde qarap, ınvestorlarǵa jan-jaqty qoldaý kórsetetin ınvestısııalyq shtab qurý qajet dep sanaımyz», — dedi Úkimet basshysynyń orynbasary.
Atalǵan shtabtyń jumysyn kelesideı qurý usynylady, memlekettik organdar men jeke bıznes ınvestısııalarǵa tapsyrys qalyptastyrady, ol «KAZAKH INVEST» UK» AQ-da jınaqtalatyn bolady.
Budan ári «Astana» halyqaralyq qarjy ortalyǵynyń quzyreti «Business Connect» bazasynda ınvestısııalyq usynystardy verıfıkasııalaý bóliginde paıdalanylatyn bolady. Verıfıkasııadan ótken jobalardyń ishinen arnaıy pýl qalyptastyrylatyn bolady, ol jobany iske asyrýdyń barlyq jolynda «Task Force» jekeshe bólimshesimen súıemeldenetin bolady.
M. Tileýberdiniń aıtýynsha, bul bólimshe – ınvestısııalyq shtab janyndaǵy jobalyq sarapshylardyń/kelissóz júrgizýshilerdiń arnaıy qurylǵan komandasy, ol jumysty uıymdastyrýǵa jáne ınvestısııalyq shtabtyń kún tártibin qalyptastyrýǵa jaýap beredi. Qajet bolǵan jaǵdaıda atalǵan komandanyń jumysyna memlekettik organdardyń, qarjy ınstıtýttary men kvazımemlekettik sektordyń qyzmetkerleri tartylatyn bolady. Investorlarmen pysyqtalatyn aıqyn jobalar ınvestısııalyq shtabtyń qaraýyna shyǵarylatyn bolady.
Shtabtyń mindeti – ınvestor úshin erekshe jaǵdaılardy qamtamasyz etý boıynsha naqty sheshim qabyldaý. Investorlar úshin erekshe sharttar bıylǵy 16 qańtarda kúshine engen «Ekonomıkalyq ósýdi qalpyna keltirý týraly zań» sheńberinde strategııalyq ınvestısııalyq kelisimde qarastyrylatyn bolady. Bıylǵy qańtar aıynda QR Úkimeti men amerıkalyq «VALMONT» kompanııasy arasynda osyndaı alǵashqy kelisimge qol qoıylǵany jóninde atap ótken jón. Sonymen, ınvestısııalyq shtab músheleri alqaly túrde qaraǵannan keıin ınvestısııalyq kelisimge qol qoıýy, jobany maquldaý bolyp sanalady. Bul algorıtm qajet bolǵan jaǵdaıda odan ári jetildiriletin bolady.
Joba boıynsha problemalyq máseleler týyndaǵan kezde ınvestorlardyń suraý salýlary prokýratýra, sottar, Memleket basshysyna tikeleı baǵynysty agenttikter men basqa da memlekettik organdar ókilderiniń qatysýymen, onyń ishinde «Astana» halyqaralyq qarjy ortalyǵy sotynyń ıýrısdıksııasyn basymdyqpen paıdalana otyryp, Investısııalyq ombýdsmen alańynda qaralatyn bolady. Osylaısha, ınvestısııalyq jobalardy ótpeli súıemeldeý men jınaqtalýy qamtamasyz etiledi, bul jaýapty organdar fýnksııalarynyń qaıtalanýyn boldyrmaýǵa múmkindik beredi.
Atalǵan tásilder Ekonomıkalyq yntymaqtastyq pen damý uıymymen, Dúnıejúzilik bankpen, «Atameken» UKP-men jáne kvazımemlekettik sektormen kelisiletin bolady. Memleket basshysynyń ınvestısııalardy basqarý júıesin reformalaý jónindegi tapsyrmasyn oryndaý boıynsha neǵurlym egjeı-tegjeıli aqparat qysqa merzimde beriletin bolady.