Elordalyq qoqys óńdeý kesheniniń aýmaǵyna jyl saıyn 300 myń tonnaǵa jýyq qoqys shyǵarylady. Onda olar birneshe kezeńnen ótedi: suryptaý, qaıta óńdeý jáne ýtılızasııa. Qala turǵyndary sanynyń ósýin eskere otyryp, óndiriletin qoqys pen qaldyqtardyń sany da artyp keledi. Qazirgi ýaqytta qalanyń árbir azamaty kúnine 1 kg qoqys shyǵarady, dep habarlaıdy Egemen.kz.
Qoqysty qaıta óńdeý lastanýdy edáýir azaıtady. Mysaly, plastık bótelkeniń tabıǵı ydyraýy ondaǵan jyldarǵa sozylsa, ony qaıta óńdeý arqyly qorshaǵan ortaǵa paıdaly materıal shyǵarýǵa bolady. Osylaısha 1 tonna qaıta óńdelgen makýlatýra 17 aǵashty saqtaıdy, al 1 tonna qaıta óńdelgen plastık bótelkeler 1,8 tonna munaıdy únemdeıdi.
Ekologııanyń nasharlaýyna jol bermeý úshin qaldyqtardy bólek jınaý óte mańyzdy ról atqarady. Osy maqsatta qalada jeke konteınerler ornatylǵan. Turmystyq qatty qaldyqtardy óńdeý deńgeıi 75 paıyz, qaıtalama shıkizatty alý 17 paıyz kórsetkishke jetti. Bul kórsetkishterdi josparly túrde arttyrý qajet. Quramynda synaby bar shamdardy jınaý úshin qala boıynsha 530-dan astam arnaıy konteıner ornatyldy. Búgingi tańda 500 myńnan astam danasy jınalyp, kádege jaratyldy.
Budan basqa, qoqys óńdeý zaýytyn jańǵyrtý júrgizilýde. Bul kásiporynnyń qýatyn eki esege jýyq, ıaǵnı jylyna 250 myń tonnadan 450 myń tonnaǵa deıin arttyrýǵa múmkindik beredi. Qaldyqtardy suryptaý jartylaı avtomatty túrge aýystyrylady.
Turmystyq qaldyqtardan basqa, qurylys qaldyqtaryn qaıta óńdeý óte mańyzdy.
О́tken jyly elordada «Soltústik jotasy» karerin odan ári qalpyna keltire otyryp, qurylys qaldyqtaryn jınaýǵa jáne óńdeýge arnalǵan alań qurylysy bastalǵan. Bul qaladaǵy ekologııa men sanıtarlyq-epıdemıologııalyq jaǵdaıdy aıtarlyqtaı jaqsartady.
«Qoqysty qaıta óńdeý arqyly qorshaǵan ortaǵa keltirilgen zııandy azaıtamyz. Qatty turmystyq qaldyqtardy ekinshi ret paıdalana otyryp, qoqys polıgondarynyń kólemin azaıtyp qana qoımaı, tabıǵı resýrstardy da saqtaımyz. Qaıta óńdeý isine qalanyń árbir turǵyny atsalysýy mańyzdy. Sonda ǵana oń nátıjege qol jetkizýge bolady» dep atap ótti Qorshaǵan ortany qorǵaý jáne tabıǵatty paıdalaný basqarmasynyń basshysy Álııa Qojabaeva.