Muǵaljar aýdanynyń Embi qalasynda jóndeý jumystary júrgizilgen kóp qabattaǵy úıdegi páterler kezekte turǵan áleýmettik jaǵynan osal toptaǵy azamattarǵa beriledi dep habarlaıdy Egemen.kz
Aqtóbe oblysyndaǵy toǵyz joldyń torabynda ornalasqan shaǵyn qalalardyń biri –Embide kóp qabatty úılerdi qaıta jóndeý, jol salý, kóshelerdi abattandyrý jumystarynyń júıeli júrgizilýiniń arqasynda shaǵyn qalanyń kelbeti birtindep ózgerip keledi.
Buryn qalaǵa kireberistegi Baýyrjan Momyshuly atyndaǵy kóshe boıyndaǵy ıesiz qalǵan qos bes qabatty turǵyn úıdiń syrtqy kelbeti adam shoshyrlyqtaı bolatyn. Embilikter ákimniń esep berý jıyndarynda jyl saıyn ony másele etip kóterip júrse de, kópten qolǵa alynbaı júrgen is edi. Iesiz úılerdiń tarıhy 1994 jyldan bastaý alady. Sol jyldary qos úıdiń páter ıeleri birinen soń biri alys shetelderge kóshe bastaǵanda, úılerdiń esik-terezeleri túgeldeı tonalyp, eń sońynda beton qabyrǵalar ǵana úńireıip qaldy. Birer jyl buryn №11-shi úıdegi 45 páter men №15-shi úıdegi 90 páterge tolyq jóndeý jumystary júrgizildi. Shatyrlary jańalanyp, esik-terzeleri qaıta qondyrylyp, podezderi jóndelip, kommýnaldyq jelilerge qosylǵan soń qalanyń kelbetine kórik qosatyn jaqsy ǵımaratqa aınaldy. Qazirgi ýaqytta kúrdeli jóndeý jumystary aıaqtalyp, árleý jumystary ǵana qaldy. Endi jaqyn aralyqta osy úıdegi 135 páter Embi qalasynda turǵyn úı kezegine turǵan áleýmettik jaǵynan osal toptaǵy azamattar –múgedekter, ata-anasyz qalǵan balalar men kóp balaly otbasylarǵa beriledi dep habarlaıdy Muǵaljar aýdandyq turǵyn úı qatynastary bólimi.