Búgin Májilis Spıkeri Nurlan Nyǵmatýlınniń tóraǵalyǵymen ótken jalpy otyrysta birqatar zań jobalary maquldandy, dep habarlaıdy Egemen.kz.
Atap aıtqanda, depýtattar aýdandyq, qalalyq jáne aýyldyq bılik deńgeıleriniń derbestigi men jaýapkershiligin keńeıtý máselelerine qatysty zań jobasyn birinshi oqylymda maquldady. Jańa zań jobasyna sáıkes, endi aýyldyq okrýgterdiń bıýdjetteri salyqtardyń jańa tórt túrinen túsetin túsimder esebinen ulǵaıtylatyn bolady.
Májilis Tóraǵasy Nurlan Nyǵmatýlın atap ótkendeı, bul jergilikti bıýdjetterdiń derbestigin damytýdyń jańa kezeńi, ol aýyldyń áleýmettik máselelerin jedel sheshýge múmkindik beredi.
Sonymen qatar, Nurlan Nyǵmatýlın bıýdjet qarajatyn tıimdi ákimshilendirýdiń mańyzdylyǵyn jáne ákimderdi daıyndaý deńgeıiniń qajettigin atap ótti.
Aıta ketý kerek, 2018 jyly qabyldanǵan Jergilikti ózin-ózi basqarý týraly zańǵa sáıkes, bólingen qarajat birinshi kezekte qaıda jumsalatyndyǵy aýyl turǵyndarynyń jınalysynda anyqtalatyn. Al, jańa zań jobasy boıynsha ákim apparatyna óz bıýdjetterin 20%-dan aspaıtyn mólsherde túzetýge múmkindik beriledi, bıýdjetti rásimderi bekitý ońaılatylady, sondaı-aq, menshikti túsimder kóleminiń 10%-nan aspaıtyn mólsherde aýyldyq bıýdjet rezervin qurý kózdeledi.
Sondaı-aq, zań jobasynda máslıhattar depýtattaryna qosymsha quqyqtar men mindetter berý jáne máslıhattar hatshylarynyń quqyqtyq mártebesin arttyrý usynylady. Búgingi jalpy otyrysta depýtattar «Sýǵa batyp ketken kemelerdi joıý týraly 2007 jylǵy Naırobı halyqaralyq konvensııasyn ratıfıkasııalaý týraly» Zań jobasyn maquldady. Konvensııanyń negizgi maqsaty sýǵa batyp ketken kemelerdi tez ári tıimdi túrde joıý jáne keme ıesiniń shekken shyǵystar men keltirilgen zalal úshin ótemaqy tóleýi jónindegi biryńǵaı halyqaralyq qaǵıdalar men rásimderdi ázirleý jáne engizý bolyp tabylady.
Konvensııa Konvensııaǵa qatysýshy memlekettiń týyn kóterip júzetin nemese Konvensııaǵa qatysýshy memlekettiń aıryqsha ekonomıkalyq aımaǵyna kiretin, jalpy syıymdylyǵy 300 jáne odan kóp tirkelimdik tonna barlyq teńiz kemelerine qoldanylady. Konvensııa sýǵa batyp ketken múlikti joıý úshin azamattyq jaýaptylyqty mindetti saqtandyrý jáne tý memleketinen saqtandyrý polısiniń bar ekenin rastaıtyn kýálik alý júıesin engizedi, sondaı-aq saqtandyrýshyǵa ótemaqy boıynsha tikeleı talaptar qoıýǵa quqyq beredi. Máselen, Konvensııanyń 5-babynda keme kapıtanynyń, keme ıesiniń ne sýǵa batyp ketken múliktiń menshik ıesiniń óziniń sýǵa batyp ketken múlki týraly habarlaý mindetteri belgilenedi jáne mundaı habarlamalardy berý tártibi reglamentteledi.
Sonymen qatar Palata depýtattary «Qazaqstan Respýblıkasy men Bolgarııa Respýblıkasy arasyndaǵy sottalǵan adamdardy berý týraly shartty ratıfıkasııalaý týraly» zań jobasyn maquldady.
Shartqa sáıkes Taraptar sottalǵan adamdardy berýge qatysty barlyq jaǵdaılarda ózara yntymaqtastyqty júzege asyrady. Qujatta sottalǵan adamdardy berýdiń jáne odan bas tartýdyń naqty negizderi kózdelgen. Shartty ratıfıkasııalaý sottalǵan adamdardy olardyń azamattyǵy tıesili qoǵamǵa qaıta ıntegrasııalaýǵa yqpal etetin bolady.
Otyrys sońynda Májilis depýtattary memlekettik organdar basshylaryna depýtattyq saýaldar joldady. Olar: A.Jamalov, A.Mılıýtın, B.Dúısenbınov, S.Imasheva, J.Ahmetbekov, S.Erýbaev, A.Qońyrov, S.Reshetnıkov, M.Ramanqulov, Q.Isa, Ǵ.Ámireev, A.Lınnık, L.Pavloves.