Batys Qazaqstan oblystyq tilderdi damytý basqarmasy jańa jobany qolǵa aldy: aqpan aıynan bastap Reseı Federasııasynda turatyn qazaq dıasporyna ókilderine qazaq tilin úıretý úshin onlaın kýrstar ashyldy. Ony Batys Qazaqstan oblystyq «Qazaq tili» qoǵamynyń tóraǵasy Altynbek Ábdilmanov tegin júrgizýde.
Mundaı usynys reseılik qazaqtardyń ózderinen túsipti. Onlaın til úırený kýrsy jyl sońyna deıin júrgizilmek.
Reseılik qandastar men Batys Qazaqstan oblystyq til basqarmasynyń arasynda iskerlik qarym-qatynas burynnan qalyptasqan. Reseı Federasııasynyń bes oblysymen shektesetin óńirde sońǵy jyldary «Altyn kópir» atty halyqaralyq festıval ótip keledi. О́tken jyly pandemııa saldarynan bul shara onlaın uıymdastyryldy. Sheteldegi qazaq dıasporalarymen ádebı-mádenı baılanys ornatý maqsatynda ótken bul sharaǵa buryn Astrahan, Volgograd, Saratov, Samara, Orynbor qazaqtary qatysatyn bolsa, sońǵy onlaın festıvalge Reseı Federasııasynyń Altaı Respýblıkasynan, Máskeý, Tomsk, Novosıbırsk, Barnaýl, Kýrgan, Ekaterınbýrg, Chelıabınsk qalalarynan qazaq dıasporasynyń 92 ókili qatysqan.
- 2019 jyly «Altyn kópir» atty halyqaralyq festıvaline Oralmen shektes bes oblystan jas qyz-jigitter keldi. Olardyń ishinde jalyndap janyp turǵan, patrıot jastar kóp eken. Ana tiline degen yqylas-yntasy keremet. Jastar tilin, salt-dástúrin bilgisi keledi, dombyra úırengisi keledi. Olarǵa tilmen birge ulttyń rýhy, sanasy sińetinin túsindirdik. Áli kúnge deıin habarlasyp turamyz, - deıdi Batys Qazaqstan oblystyq «Qazaq tili» qoǵamynyń tóraǵasy Altynbek Ábdilmanov.
Batys Qazaqstan oblystyq tilderi damytý basqarmasy basshysynyń mindetin atqarýshy Sveta Ǵanıevanyń aıtýynsha, qazir osy kýrsqa qatysý úshin óńirmen kórshiles oblystarda turatyn qazaqtardan ótinish jınalyp jatyr eken. Astrahan, Volgograd, Saratov, Samara jáne Orynbor oblystaryndaǵy qandastarymyzdyń árqaısysynan 3 adam, barlyǵy 15 adam iriktelip, jyl sońyna deıin onlaın kýrs júredi. Bir ereksheligi, bul kýrsta tek qana til úıretilmeıdi, qazaq halqynyń ádet-ǵuryp, salt-dástúrine qatysty da onlaın sabaqtar bolady. «Kýrs sońynda biz oǵan qatysqan qandastarymyz ana tilin eń tómengi deńgeıden ortasha dárejege deıin meńgerip, ári halqymyzdyń kóptegen salt-dástúrinen habardar bolyp shyǵady dep senemiz» deıdi Sveta Ǵanıeva. Onlaın kýrs sabaqtary aqpan aıynyń sońyna taman bastalyp, aptasyna eki márte ótip turmaq.
Árıne, memlekettik tildi meńgerý máselesi óz elimizde de ózekti taqyryp. Konstıtýsııamyzdyń 7, 93-baptarynda «Úkimet, jergilikti ókildi jáne atqarýshy organdar, arnaýly zańǵa sáıkes, Qazaqstan Respýblıkasynyń barlyq azamaty memlekettik tildi erkin ári tegin meńgerýi úshin qajetti uıymdastyrýshylyq, materıaldyq jáne tehnıkalyq jaǵdaıdyń bárin jasaýǵa mindetti» dep kórsetilgen. Osy maqsatta Batys Qazaqstan oblysynda da jyl saıyn qazaq tilin tegin oqytý kýrstary uıymdastyrylyp keledi. Sońǵy úsh jyl ishinde oblysta 2,5 myńnan asa adam qazaq tilin oqytý kýrsynan ótse, aǵylshyn tili kýrsyn 3 myńnan astam adam támamdaǵan.
Batys Qazaqstan