Senator Aqylbek Kúrishbaev agrarlyq ǵylymdaǵy tıimdiliktiń tómendiginiń bir sebebin atap ótti. Depýtattyń pikirinshe, zertteý júrgizýge beriletin merzim óte qysqa bolyp otyr. Senator agrarlyq saladaǵy ǵylymı izdenisterdi bıýdjetti úsh jyldyq josparlaý kezeńine baılanystyrmaý kerek ekenin atap ótti. Tabıǵattyń óz zańy bar, sondyqtan aýyl sharýashylyǵyndaǵy jańa sortqa nemese negizgi tehnologııalarǵa keminde 5 jyl bóliný kerek.
«Qazir biz ózimizdiń ǵylymı jobalarymyzǵa sheteldik ǵalymdardy tarta almaǵandyqtan, sheteldik tehnologııalardyń transfertin qamtamasyz ete almaı otyrmyz. Sebebi bizdiń seriktesterimiz 3 jyl merzimde aýyl sharýashylyǵynda mańyzdy ǵylymı nátıjelerge qol jetkizýdiń múmkin emestigin túsinedi. Demek, agrarlyq ǵalymdarymyzdy biz ózimiz tyǵyryqqa tirep otyrmyz. Árıne, osydan keıin óndiristiń suranysyn óteı almaıtyn, «shıki» ǵylymı jobalar paıda bolady», dep atap ótti depýtat.
Senator qazaqstandyq ǵylymnyń damý problemalary týraly aıta kelip, 2020 jylǵy jahandyq ınnovasııalyq ındekste bizdiń elimiz Reseı, Belarýs, Armenııa jáne Monǵolııadan artta qalyp, 77-orynǵa ıe bolǵanyn eske saldy. Al 2019 jyly Qazaqstanda ınnovasııalyq ónim kólemi eldiń IJО́-niń 1,6% - yn qurady. Salystyra qaraǵanda Reseıde bul kórsetkish 8 ese, al tehnologııalyq damyǵan elderde 20-30 ese joǵary.
Aqylbek Kúrishbaevtyń pikirinshe, kóptegen reformalarǵa qaramastan, elimizde ǵylym men joǵary bilim berýde júıeli ózgerister júrgizilgen joq. Senator Qazaqstan áli kúnge deıin álemdik ǵylymı jáne bilim berý keńistigine yqpaldasa almady dep sanaıdy.
«Bizde qurylǵan birneshe ǵylymı-zertteý ýnıversıtetteriniń jumys isteý mazmuny emes, tek mańdaıshasyndaǵy jazýy ózgerdi. Al salalyq mınıstrlikter tipti basqa jolmen júr. Olar ózderine baǵynyshty ýnıversıtetterdiń ǵylymı áleýetin nyǵaıtýdyń ornyna, olardyń ústinen neshe túrli ákimshilik qurylymdardy oılap tabýda. Mundaı júıe eshbir damyǵan elde joq», dedi senator.
Ol ǵylymdy damytý jáne sapaly ǵylymı áleýetti qalyptastyrýdaǵy mańyzdy mindetterdi sheshý úshin Bilim jáne ǵylym mınıstrligine nazar aýdarýdy surady.