Batys Qazaqstan oblysy Qaztalov aýdanyna qarasty Bozoba aýyly mańynda jeńil kóligimen balshyqqa batyp qalǵan jeńil kólikten 7 adam qutqaryldy. Onyń ekeýi – jas bala, dep habarlaıdy Egemen.kz.
Oqıǵa tún ishinde bolǵan. Qaztalov aýdandyq tótenshe jaǵdaılar bólimine sýyt habar tańǵy saǵat 5.49.-da jetipti. Qutqarýshylar jedel jolǵa shyǵyp, Bozoba aýylynyń mańynda turyp qalǵan VAZ-2115 jeńil avtokóliginen 7 adamdy qutqaryp aldy. Jolaýshylardyń ekeýi – jas bala edi. Abyroı bolǵanda eshkim zardap shekken joq, dáriger kómegine eshkim júginbegen.
Aıta keteıik, sońǵy kúnderi Batys Qazaqstan oblysy aýmaǵynda jańbyr jaýyp, óńirdi qalyń tuman basyp tur. Sonyń nátıjesinde halyqaralyq, respýblıkalyq deńgeıdegi keıbir joldar jabyldy. Ásirese Batys Qazaqstan oblysynyń eń shalǵaıdaǵy Jánibek jáne Bókeı ordasy aýdandary turǵyndary jol azabyn shegip, qıyndyq kórýde. О́ıtkeni bul aýdandardy Oral qalasymen jalǵaıtyn tas jol joq.