Qytaıdyń kontınenttik bóliginde bir táýlik ishinde birde-bir juqtyrý jáne birde-bir ólim jaǵdaıy tirkelmegen.
QHR Densaýlyq saqtaý isteri jónindegi memlekettik komıtetiniń málimetinshe, shetelden ákelingen tek 10 ǵana jańa juqtyrý jaǵdaıy tirkelgen.
Eýrokomıssııa Eýroodaq aýmaǵynda óndiriletin preparat dozalaryn eksporttaýǵa tyıym salýdy engizýdi josparlap otyr. Basty sebep EO elderinde koronavırýsqa qarsy vaksınanyń jetispeýshigi jáne AstraZeneca brıtandyq-shvedtik vaksına óndirýshisiniń jetkizilimine qatysty máseleler bolyp otyr.
Brazılııa, bir kúnde 3 myńnan astam adam koronavırýstan qaıtys bolý sebebinen, AQSh-tan keıingi álemdegi ekinshi el atandy. Eldiń Densaýlyq saqtaý mınıstrliginiń málimetinshe, ótken 24 saǵat ishinde 3 251 adam qaıtys bolyp, koronavırýsty juqtyrýdyń 82 493 jańa jaǵdaıy anyqtaldy. COVID-19 pasıentteriniń kóp bolýyna baılanysty eldiń 26 shtatynyń 24-inde jáne el astanasynyndaǵy aýrýhanalar artyq júktememen jumys isteýde.
Ulybrıtanııada alǵashqy lokdaýn bastalǵannan bergi bir jyl ishinde koronavırýstyq ınfeksııadan 126 000-nan astam adam qaıtys bolǵan. Ulybrıtanııa parlamenti pandemııa qurbandaryn bir mınýt únsizdikpen eske aldy. Sondaı-aq, bir mınýttyq únsizdik búkil eldegi aýrýhanalary men basqa da mekemelerde ótti. Eske alý belgisi retinde turǵyndar tarapynan úıleriniń esik aldarynda keshke taman shamdar men maıshamdardy jaqqan. "London kózi" sholý dóńgelegi, Lıverpýldegi Liver Building jáne attas jaǵalaý mańyndaǵy qalada ornalasqan Blekpýl munarasy sary túspen jaryqtandyrylǵan.
Germanııa úkimeti aldaǵy aılarda elde COVID-19 vaksınalarynyń óndirisi edáýir artyrýǵa nıettenip otyr. Úkimettiń halyqty vaksınasııalaý jónindegi ýákili Krıstof Krýpp mamyr aıynda aptasyna shamamen 6 mıllıon doza vaksına shyǵarýǵa bolatyndyǵyn aıtty. Krýpp bul kórsetkishti arttyrǵan jaǵdaıda vaksınasııa tek arnaıy ortalyqtarda ǵana emes, otbasylyq dárigerlerden de alýǵa bolatyndyǵyn joqqa shyǵarmady.
COVID-19 aýrýynyń tez ósimine baılanysty Iemende tótenshe jaǵdaı rejımi engizildi. Elde tek aýyr belgileri bar naýqastar ǵana koronavırýsqa tekseriletindigine qaramastan, aqpan aıynan bastap COVID-19 rastalǵan jaǵdaılardyń sany edáýir ósip otyr. Sońǵy táýlikte indettiń 98 rastalǵan jáne 168 rastalmaǵan jaǵdaıy tirkeldi.