Aqtóbe qalasynda kóktemgi sý tasqyny kezinde tótenshe jaǵdaılardyń aldyn alýǵa daıyndyq jumystary bastaldy. Bul maqsatta jergilikti bıýdjetten 155 mln teńge bólingen, dep habarlaıdy egemen.kz.
Oblys ortalyǵy men onyń tóńiregindegi eldi mekender boıynsha sý tasqynyna qarsy is-sharalarǵa 100-den astam sý sorǵysh kólik, 20-dan astam arnaýly tehnıka jáne 5 motopompa jumyldyrylady.Sondaı-aq qala shetindegi baý-baqsha ujymdary ornalasqan aýmaqtaǵy sý deńgeıin baqylaýda ustap, jeke turǵyn úılerge kirmeýi úshin kúrt kóterilgen sýdyń jolyn bógeýge 4 myń tonna qum, saz, qıyrshyq tas daıyndaldy. Tasqynǵa qarsy sharalarǵa 7 merdigerlik uıym men 160-tan astam arnaıy tehnıka qatysady.
Sońǵy kúnderi Aqtóbe oblysyn aýmaǵynda aýa temperatýrasynyń kúrt jylynyp, qys ortasynda kóktem kelgendeı tabıǵat qubylysy kúrt ózgerdi. Kesheden beri aýa temperatýrasy +2 gradýsqa deıin joǵarylap, qar erı bastady. Sınoptıkter kelesi aptada kún raıy qaıta qatańdaıdy degen boljam jasap otyr. Soǵan qaramastan kún qaıta sýytsa da jyldaǵydaı óńirde aqpan aıynyń ortasynan aýa kóktemgi jumystarǵa daıyndyq bastalady. Bıylǵy qysta qar az túskenimen, kúzde toń jerge birden qatty. Ylǵaldyń kúzde jerge sińip ketpeı,mtopyraqtyń betki qabatynda saqtalýy kóktemde ósimdikterge jaqsy qorek bolary anyq.
Eki-úsh kúnnen beri Aqtóbeniń irgesinen arnaıy bólingen polıgondarǵa qaladan 122 myń tekshe metr qar shyǵaryldy. Qar qoqys polıgonyna jáne «Aqjar-2» turǵyn úı massıvi janynan arnaıy bólingen aýmaqqa tasylýda. Osy aıdyń sońyna qaraı kommýnaldyq mekeme qyzmetkerleri qala kóshelerindegi sý aryqtary men sý ótkizetin shaǵyn kanaldardy tazalaýdy bastaıdy.Búginnen bastap tótenshe jaǵdaılar departamentiniń 63 qyzmetkeri men 18 tehnıka qalada táýlik boıy kezekshilikke shyǵady.