Sońǵy ýaqyttary qazaqstandyqtar mobıldi telefon kómegimen tólem jasaýdy jıilete bastaǵan. Ásirese, Túrkistan oblysy turǵyndary qolma-qol aqsha tóleýdi kúrt azaıtqan. Onlaın tólem jasaý deńgeıi 6,8 ese ósip, 2,7 trln teńgege jetken. Sondaı-aq eleýli ósim Jambyl oblysynda (824,6 mlrd teńge) jáne Qyzylorda oblysynda (653,4 mlrd teńge) baıqalǵan.
Kaspi.kz kompanııasy basqarma tóraǵasy Mıhaıl Lomtadze onlaın tólem júıesiniń damýy azamattardyń ómir súrý sapasyn jaqsartady deıdi. Bul týraly ol Almatyda ótken dástúrli Digital Almaty 2021 forýmynda aıtty.
– Bizdiń ekojúıede bar barlyq servıske qaraıtyn bolsaq, eshqandaı komıssııasyz 5000 qyzmet túrine tólem jasaýǵa bolady. Onyń bári kúndelikti qajettilikterge arnalǵan. Satyp alý aýdarymdaryn da komıssııasyz júzege asyramyz. Elektrondy kommersııa naryǵyndaǵy iri dúkender bizdiń ekojúıemen tolyq ıntegrasııalanǵan. Qazaqstandyqtar satyp alý arqyly jetkizip berý qyzmetin qosa ala alady. Jetkizip berý qyzmetin de tegin qyldyq. Tehnologııalardy damytýdyń, tehnologııalardy ınvestısııalaýdyń úlken múmkindigi bar bolǵandyqtan biz seriktesterge de úlken jol ashyp otyrmyz. 20 000 seriktesimiz bizdiń platformaǵa qosylǵan. Onyń kóbi shaǵyn jáne orta bıznes ókilderi, – deıdi Lomtadze.
Onyń aıtýynsha, bıyldyń ózinde elimizde tólemdi kartamen nemese mobıldi qosymshamen jasaıtyndar úlesi 90 paıyzǵa jetýi múmkin.
– Sondaı-aq jeke qarajatty basqarý boıynsha da qosymshamyzdy jetildirdik. Qazaqstandyqtar qosymshany paıdalaný arqyly depozıtke aqsha jınaıdy, nesıe alady, tólem kartasyn alady. Sondaı-aq memleketpen, sıfrlandyrý mınıstrligimen birlese otyryp jeke kásipkerlikti onlaın tirkeý, avtokólikti qaıta rásimdeý, bıýdjetke salyq tóleý sııaqty múmkindikterdi de usynyp otyrmyz. Osynyń bári álemde analogy joq bir ǵana sýper qosymshaǵa engizilgen. Sonyń arqasynda onlaın tólemderdi jasaý turǵysynan da kóshbasshy atanyp otyrmyz. Qazaqstanda onlaın tólem jasaý deńgeıi asa qatty qarqynmen ósip kele jatyr. 2016 jyly jeltoqsan aıynda onlaın tólem 161 mlrd teńge bolsa, 2020 jyldyń jeltoqsan aıynda eldegi onlaın tólem kórsetkishi 4,3 trln teńgege jetti. Demek, tórt jylda 29 ese ósken. Qazaqstandaǵy onlaın tólem kórsetkishi 72 paıyzdy qurap otyr. Jaqyn arada bul kórsetkishtiń 90 paıyzǵa jeterine senimdimiz, – dedi Kaspi.kz júıesin qurýshy.