Aqpan kele Aspantaýdyń aıasyna ádettegideı qalyń qar qonady. Maqsat-tilek jetpeıtin záý bıikten qalqyp túsken aq ulpalar Qarasýdyń arnasyn tasytardaı alqynady kelip. Ertede Elshenbúırek eteginde terbele aqqan osy erke ózenge tereń kóz salyp, qara bala balyq aýlaýshy edi-aý. Taǵdyryna arqaý, tektiligine tireý bolǵan mańǵaz topyraqqa tabany talaı qyzǵan-dy. Hantáńirine arqasyn tirep, Qarasazdy qara óleńmen árleıtin sonda.
Aqıyq aqyn aıdyn kólge aqqý bolyp oralǵan desedi. Dál týǵan kúniniń qarsańynda. Tún qysqaryp, tuman seıilgen shaqta aq qanatty qustar aqyq jyr ıesiniń armanyn arqalap kelgen Qarasazǵa. Qandaı ǵajap qoıylym desken muqym qazaq. Aqjúrek aýyl jurty bul oqıǵany jaqsy yrymǵa balap, Muzbalaq aqynnyń «sálemi» dep súıingen sol sátte. Baıtaq dala qasıetti qara óleńniń shalqar kóshi qarapaıym Qarasazǵa qaıta kidirgendeı kúı keshti. «Jetim kóldi» jetimsiretip ketken kıeli qustar Qarasýdy aınala ushyp, qıqýlap kóńil tolqytqan-dy. Toqsanǵa aıaq basqan alyp aqynnyń mereıtoıyna Tabıǵat-ana tosyn syı jasaǵandaı, júregimiz bir elegizip edi. Mine, búgin sol meıirimdi mezetten jyl attapty.
Qarasýdy qoınyna alyp, qara óleńge qaıyq baılap, jaılaý jaǵasynda eki aqyn jatatyn edi. Kórgen jannyń áli kókeıinde saırap tur sol sýret. Sonda Muqaǵalı: «Áı, Erkin (Ibitanov) túbi osy aýyldy myna jomart jurt meniń esimimmen ataıtyn bolady. Kórde tur», dep kóńili shalqı sóılep, jyryn jalǵaıtyn. Sózden ese jiberse, jyr júırigi Erkin Ibitanov bolar ma? Taýyp aıtatyn ádetine salyp, aspaı-saspaı: «Muqa, Muqa saǵan-aq syıladym sol shaǵyn aýyldy. Maǵan aýdannyń atyn berse de jetedi» dep oraıyna jyǵyp, aǵasynyń aldyn orap ketipti. Qarasazdyń qos perzentiniń aıtqany aıdaı keldi. Qazir «Qarasaz» el arasynda «Muqaǵalı aýyly» atanyp ketti. Al aýdan aty Ibitanovtyń babasyna buıyrdy.
Búginde sol eski jurtta esi kirgen baladan eńkeıgen qartqa deıin Muqaǵalı jyrymen shól basady. Tárbıeniń bir tarmaǵy ispetti. Kósheden jolyqtyrǵan qyz-kelinshekti toqtata qalyp suraı qalsańyz, aqyn jyryn jatqa aıtýǵa bar. Shalkódeniń ár tóbesi myńǵyrǵan mal, jaıaýdyń aıaǵy batpas qalyń ný, bulaq boılaǵan tútin, bári-bári Muqaǵalı jyrlaǵandaı menmundalap turady. Aýyq-aýyq aqqýyn joqtaǵan aıdyndaı, ashyq aspan ǵana aqynyn joqtap án aıtatyndaı...