Oral qalasynda Ulttyq ulan «Batys» óńirlik qolbasshylyǵyna qarasty 5517 áskerı bóliminiń áskerı jasaǵy «Remmı» atty qyzmettik ıttiń kómegimen esirtki satýmen aınalysqan adamdy ustap aldy, dep habarlaıdy Egemen.kz
Esirtki oramy Oraldaǵy túzetý mekemesiniń mańynan tabylǵan. Kún batyp, qarańǵy túsken ýaqytta túrme mańynda kezekshilikte júrgen áskerı jasaq Shırokaıa kóshesinde kúdikti er adamdy baıqap qalady. Álgi adam polısııa formasyn kıgen saqshylardy kórgende belgisiz zatty laqtyryp jibergen. Jasaq bastyǵy Baqytjan Aıtjan, jasaqshylar Álmuhamed Qabataev pen kınolog-efreıtor Qundyzbek Qapaev kúdiktini uzatpady. Al «Remmı» atty qyzmettik ıt sol mańdy timiskileı jónelip, ishinde esirtki zaty bar qaǵaz oramasyn tapty.
Tabylǵan esirtki oramy men onyń ıesi – 39 jasar azamat ár qaraı tergeý úshin polısııa qyzmetkerlerine tapsyryldy.
«Qyzmetti ótkerý kezinde kórsetken qyraǵylyǵy men joǵary kásibı sheberligi úshin áskerı jasaq 5517 áskerı bólimi komandıriniń atynan marapattaldy», deıdi «Batys» óńirlik qolbasshylyǵynyń baspasóz qyzmetiniń bastyǵy, podpolkovnık Erbolat Sultanov.
Aıta ketý kerek, «Remmı» Ulttyq ulanda bes jyldan beri qyzmet etip keledi eken. Ulttyq ulan jaýyngerleri «Remmıdiń» kómegimen byltyr esirtki satýdyń bes faktisin anyqtaǵan.
Batys Qazaqstan