Bıyl Aqtóbe oblysynyń 10 eldi mekenine aýyz sý qubyry, 8 eldi mekenine gaz qubyry tartylady. Bul týraly oblys ákimi Ońdasyn Orazalın turǵyndar aldyndaǵy esep berý kezdesýinde málimdedi dep habarlaıdy Egemen.kz.
О́tken jyly ortalyqtandyrylǵan sýmen qamtamasyz etý boıynsha 12 joba iske asyrylsa, bıyl 5,8 myń turǵyny bar 10 eldi mekenge sapaly sý jetkiziledi. Osylaısha jyl sońyna deıin 900 myń turǵyny bar óńir halqyn sýmen qamtý jospary 96,9%-ǵa deıin jetkiziledi.
Sońǵy jyldary oblys ortalyǵy tóńireginde ornalasqan eldi meken turǵyndary jaz kezinde sý tapshylyǵyn sezinip júr. Bul máselede jurtshylyqtyń talap-tilekterin eskere otyryp, qala irgesindegi jerasty sý kózderi shoǵyrlanǵan Elek jáne Qundaqtyqyr toǵanyn qaıta qalpyna keltirýdi, sondaı-aq Sarybulaq pen Moıseev ken oryndaryndaǵy jerasty sýlaryn izdeý-barlaý jumystary jalǵaspaqshy. Jerasty sý kózderi burǵylanyp, qubyr tartylsa, Aqtóbe qalasynyń turǵyndaryn aldaǵy 40 jylǵa deıin aýyz sýmen qamtamasyz etýge múmkindik beredi degen boljam jasalyndy.
Sondaı-aq ótken jyly 13 eldi mekenge gaz tartylsa, bıyl 8 aýyl turǵyndaryn kógildir otynmen qamtamasyz etý josparǵa engizildi. Olardyń qatarynda Juryn, Qarakól, Álimbet, Qumqudyq, Qutıkól, Ashysaı, Qarataýsaı, Baıturasaı, Amankól, Jarma eldi mekenderi bar. Qazir eń birinshi kezekte 5 eldi mekenge júrgiziletin qubyr jumystaryna 10 mıllıard teńge bólinip, onyń tehnıkalyq-smetalyq qujattary ázirlenip jatyr. Jumystar josparlanǵan merzimde iske asyrylsa, jyl sońyna qaraı Aqtóbe oblysynyń 315 eldi mekeniniń 126-sy kógildir otynmen qamtamasyz etiledi. Aıta ketý kerek, qazirgi kezde Aqtóbe oblysy aýmaǵyndaǵy gaz qubyrlarynyń jalpy uzyndyǵy 6 myń 720 shaqyrymdy quraıdy.