Shymkent qalasynda iri qara maldy bordaqylap qana qoımaı, odan sapaly et alatyn, naqtyraq aıtqanda naryqta qymbat baǵalanatyn mármár et ónimin óndiretin sharýaqojalyq bar. Bul qazirgi tańda meıramhanalarda joǵary suranysqa ıe et túri.
Búginde sharýashylyqtardyń kóshin bastap kele jatqan qojalyq Qarataý aýdany, Saıram turǵyn alabynda ornalasqan. «Nýralı» sharýaqojalyǵynda iri qara maldyń mármár etin bere alatyn tuqymdary bordaqylanýda. Atap aıtqanda, 30%-y «Aberdın-Angýs», 30%-y «Áýlıekól», 30%-y «Qazaqtyń aqbas» jáne qalǵan 10%-y jergilikti iri qara mal tuqymdary. О́nimder qalamyzdan bólek elimizdiń ózge aımaqtaryna da jóneltiledi.
Qojalyq ıesi, sharýa Sheralı Ýsmanovtyń aıtýynsha, kásibin eń aldymen 2005 jyly 7 bas iri qara mal bordaqylaýdan bastaǵan. Mal sharýashylyǵyn damytýdy myqtap qolǵa alǵan ol búginde qorajaıynda myń basqa jýyq iri qara maldy baptaýda.
Aıta keteıik, 2010 jyly memleket tarapynan kórsetilgen qoldaý arqasynda sharýashylyq aýmaǵyn ulǵaıtyp, mal bordaqylaý alańynyń syıymdylyǵyn 400 basqa, 2014 jyly 700 basqa apardy.
Al 2018 jyly mal bordaqylaýmen qosa saǵatyna 2 tonnaǵa deıin qurama jem shyǵaratyn sehty iske qosqan. Bul óz kezeginde sharýa úshin et óniminiń kólemin arttyrýǵa septigin tıgizdi deýge bolady.
Kásiptiń kózin tapqan qala turǵyny bul mejemen toqtap qalmaı, 2019 jyly bordaqylaý alańynyń syıymdylyǵyn 1000 basqa deıin jetkizdi.
Jeke kásipker otbasylyq sharýasyn odan ári jandandyrý maqsatynda aldaǵy jyly qorajaı aýmaǵynyń syıymdylyǵyn 1500 basqa deıin jetkizýdi, sonymen birge sapaly et óniminiń úlesin arttyrýdy josparlap otyr.
Qosymsha suraqtar boıynsha: 8 (7252) 24-74-08.