Aqmola oblysynyń Aqkól qalasynda ýchaskelik polısııa pýnkti ashyldy, dep habarlaıdy Egemen.kz oblystyq Polısııa departamentiniń baspasóz qyzmetine silteme jasap.
Vedomstvonyń málimetinshe, aýdan ortalyǵynda ornalasqan nysannyń ashylýyna Polısııa departamentiniń bastyǵy general-maıor Armanbek Baımýrzın qatysty.
Ýchaskelik polısııa beketi Aqkól orman sharýashylyǵy, Ernazar, Radovka, Rodnıkı stansııasy sııaqty eki ákimshilik ýchaske men aýyl turǵyndary úshin qoljetimdi.
Aýdan ákimdigi ýchaskelik polısııa pýnktin ashýǵa qoldaý bildirip, sport mektebiniń ǵımaratynan bólme bergen eken. Bul azamattardyń polısııaǵa júginý prosesin edáýir jyldamdatady, sondaı-aq olarǵa zańdylyq pen quqyqtyq tártipti buzýshylyqtar týraly ýaqtyly habarlaýǵa múmkindik beredi.
«Qoǵamdyq tártipti qamtamasyz etýde ýchaskelik ınspektorlardyń róli zor. Olar azamattarmen barynsha tyǵyz qarym-qatynasta bolady jáne ákimshilik ýchaskede turǵyndarynyń problemalaryn sheshýde jergilikti atqarýshy organdarǵa kómek kórsetedi. Buryn ýchaskelik ınspektorlar aýdandyq polısııa bóliminiń bazasynda jumys istegen. Endi olarǵa shalǵaı ákimshilik ýchaskelerdiń turǵyndaryna jetý jeńil bolady. Ýchaskelik ınspektorlardyń ózderi turǵyndarmen tıimdi jumys isteı alady», dedi vedomstvodan.
Aıta keteıik, atalmysh ýchaskelik polısııa pýnktinde tártip saqshylaryna halyqpen jumys isteýi úshin barlyq jaǵdaı jasalǵan. Qajetti keńse atrıbýttary, monıtor bar, osy arqyly qala kóshelerinde ornalasqan beınebaqylaý kameralarynan tikeleı beıne kórinisterdi baqylap otyrýǵa bolady.
Ýchaskelik polısııa pýnktine polısııa kapıtany Saıat Seıithojın pen qatardaǵy polısııa Danııar Sovetov bekitildi.
Osy jerde Polısııa departamentiniń bastyǵy general-maıor Armanbek Baımýrzın ýchaskelik polısııa ınspektorlarymen birge azamattarǵa jeke qabyldaý ótkizdi. Qabyldaýǵa kelgen jaqyn mańdaǵy eldi mekenderdiń turǵyndary kóshi-qon, tabıǵatty qorǵaý zańnamasy salasyndaǵy máselelerdi kóterdi, sondaı-aq, ýchaskelik polısııa ınspektorlary men ıývenaldy polısııa ınspektorlaryna alǵys bildirdi.
Vedomstvodan atap ótkendeı, aldaǵy ýaqytta Aqkól aýdanynda polısııa bóliminiń jańa ǵımaratyn salý josparlanyp otyr.
Barlyq quqyqtar qorǵalǵan. inform.kz belsendi siltemeni paıdalanyńyz https://www.inform.kz/kz/akmola-oblysynyn-akkol-audanynda-uchaskelik-policiya-punkti-ashyldy_a3753033