Sozaq aýdanynda byltyr memlekettik «Invest» baǵdarlamasy aıasynda aýyl sharýashylyǵy salasyn damytyp, shalǵaıdaǵy malshylarǵa qoldaý kórsetý maqsatynda 585 mln teńgege 43 artezıan qudyǵy qazylǵan. Jaıylymdardy sýlandyrý maqsatynda ornatylǵan qudyqtarǵa 320 mln teńgeden astam sýbsıdııa berilgen. Odan bólek, 68 sharýa qojalyǵyna kúnnen qýat alatyn qondyrǵy ornatylyp berilgen. Memleket tarapynan bul maqsatta 164 mln teńgeden astam sýbsıdııa tólendi, dep habarlaıdy Egemen.kz Túrkistan oblysy ákiminiń baspasóz qyzmetine silteme jasap.
Jalpy aýdanda 800-den astam agroqurylym bar. Aýdanda aýyl sharýashylyǵy salasyn damytý negizgi maqsattardyń biri. Máselen, 2018-2020 jyldary mal sharýashylyǵyna arnalǵan jalpy 62 artezıan qudyqtary ornatylǵan.
Bıyl da shalǵaıdaǵy mal sharýashylyǵymen aınalysatyn 40 sharýalylyqqa qudyq qazylyp, agroqurylymdarǵa kún sáýlesi arqyly jaryqtandyrý qondyrǵylary ornatylady. О́ńirde sharýalardy qoldap, sýbsıdııalaýǵa baǵyttalǵan «Invest» memlekettik baǵdarlamasyna degen qyzyǵýshylyq artýda.